Së paku katër eksplodime kanë ndodhur në pjesë të Sirisë, që janë nën kontroll të qevrisë, në qytetet Tartous dhe Homs, dhe përgjatë një rruge jashtë kryeqytetit Damask.
Agjencia shtetërore e lajmeve e Sirisë, SANA, ka raportuar sot se dy shpërthime simultane e kanë goditur hapësirën në urën Arzouna, në hyrje të qytetit bregdetar veriperëndimor, Tartous.
Televizioni shtetëtor i Sirisë ka raportuar se eksplodimi i parë është kryer me një makinë-bombë, ndërsa i dyti ishte sulm vetvrasës, në çastin kur në vendin e sulmit të parë erdhën ekipet e shpëtimit.
Agjencia SANA, po ashtu ka raportuar se sulmi me makinë – bombë ka ndodhur në qytetin Homs, në hyrje të lagjes Baba Tadmur.
Observatori sirian për të drejtat e njeriut me seli në Londër, që i ka vëzhguesit në terren, ka raportuar se nga shpërthimi në Homs, kundër një postblloku ushtarak, janë vrarë dy oficerë.
Televizioni shtetëror i Sirisë ka raportuar se përgjatë autostradës Damask – Bejrur, afër qytetit Saboura, po ashtu, ka pasur shpërthim.