Zyrtarët e SHBA-së thonë se një luftanije amerikane ka qenë cak i një rakete të lëshuar nga territori i kontrolluar nga rebelët huthi në Jemen.
Raketa ka dështuar të godasë luftanijen amerikane, por ky është incidenti i tretë i kësaj natyre në javët e fundit.
Zyrtarë të mbrojtjes në SHBA kanë thënë se disa raketa janë lëshuar drejt luftanijes amerikane, e cila po lundronte në ujërat ndërkombëtare në Detin e Kuq, por anija ka arritur që të manovrojë dhe i është shmangur raketës.
Shtetet e Bashkuara, me autorizimin e presidentit Barack Obama, më 13 tetor kanë shkatërruar disa radarë në Jemen, prej ku besohet se janë lëshuar edhe dy raketat paraprake.
Vendimi i 13 tetorit është aksioni i parë ushtarak i Uashingtonit drejt caqeve të rebelëve huthi në Jemen.
Rebelët huthi kanë mohuar se kanë sulmuar luftanijet amerikane.
