Shtetet e Bashkuara i kanë hedhur poshtë pretendimet se kanë ndonjë plan për t’i furnizuar kryengritësit në Siri me lansues raketor portativ, pasi Rusia tha se armatimi i këtillë vdekjeprurës mund të përfundoj në duart e “xhihadistëve”.
“Pozicioni ynë lidhur me MANPADS nuk ka ndryshuar. Ne do të kishim shqetësim të thellë për këtë lloj të armatimit për të hyrë në Siri”, tha zëdhënësi i Departamentit amerikan të shtetit, Mark Toner, pasi ministri i jashtëm rus, Sergei Lavrov, për këtë çështje ka biseduar dje me telefon me sekretarin amerikan të shtetit, John Kerry.
“Ne nuk e furnizojmë me asnjë lloj të MANPADS-it opozitën siriane”, tha Mark Toner.
Një legjislacion aktual për shpenzimet ushtarake të Shteteve të Bashkuara, e përmban edhe dispozitën për lehtësimin e kufizimeve për armatimin e kryengritësve sirianë, duke lejuar që administrata të dërgoj atje raketa kundërajrore që mund të lansohen nga krahu, për grupet kryengritëse, pasi ta njoftoj Kongresin.
Zëdhënësja e Ministrisë së jashtme ruse, Maria Zakharova, ka vlerësuar se kjo dispozitë paraqet “akt armiqësor”, që e hapë rrugën për kryengritësit dhe grupet militane të ndërlidhura në Siri, përfshirë Frontin Nusra dhe Shteti Islamik, të sigurojnë armatim të tillë dhe për ta përdorin atë kundër aeroplanëve rusë.