Ndërlidhjet

Lajm i jashtëzakonshëm

Ivanov: Armata e gatshme të mbrojë integritetin e Maqedonisë


Presidenti i Maqedonisë, Gjorge Ivanov, ka deklaruar se Armata e Maqedonisë është e gatshme t'i përgjigjet sfidave dhe të mbrojë integritetin territorial dhe pavarësinë e vendit.

Në një manifestim ushtarak në Kriva Pallanka, Ivanov ka thënë se “edhe sot, sikur edhe para një çerek shekulli, po ballafaqohemi me sfida. Por, edhe sot sikur para çerek shekulli, kemi Armatën e Maqedonisë e cila është mbrojtëse nga kërcënimet, krenari për qytetarët dhe shpresë për paqen në vend”.

Ndërkohë, kryetari i VMRO DPMNE-së, Nikolla Gruevski, tha se populli maqedonas nuk do të tërhiqet ndërsa gjendjen në vend lidhur me krizën qeveritare e vlerëson si tensionuese dhe të paqartë.

“Është të vështirë të parashikohet tjetër pos protestave, kur veproni në kundërshtim me vullnetin e qytetarëve”, ka deklaruar Gruevski në një intervistë për Telegrafin e Serbisë.

Gruevski ka akuzuar liderin opozitar, Zoran Zaev, për siç ka thënë, "skenar për ridefinimin e plotë të shtetit dhe ndryshimin e konceptit të saj".

Në pyetjen nëse gjendja në Maqedoni mund të përkeqësohet, Gruevski tha se mllefi i popullit është i madh.

XS
SM
MD
LG