Udhëheqësi i opozitës në Armeni, Nikol Pashinian, u zotua se do t'i vazhdojë protestat antiqeveritare, pasi ushtruesi i detyrës së kryeministrit, Karen Karapetian, refuzoi të takohet me të.
Pashinian bëri thirrje për protesta masive më 1 maj, kur Parlamenti pritet të votojë për kryeministrin e ri.
Pashinian i ka propozuar Karapetianit të takohen për të diskutuar vetëm transferimin paqësor të pushtetit dhe ka insistuar që bisedimet të mbahen me praninë e mediave.
Por, një zëdhënës i Karapetianit tha se ushtruesi i detyrës së kryeministrit beson se negociatat, ku njëra palë dikton agjendën, nuk mund të konsiderohen negociata.
Refuzimi i Karapetianit u bë pasi ai bisedoi me presidentin rus, Vladimir Putin.
Rusia është aleatja më e afërt e Armenisë dhe partner i saj ekonomik.
"Opozita do t'i vazhdojë demonstratat. Qindra mijëra njerëz do të dalin në rrugë më 1 maj, kur do të zgjidhet kryeministri i ri", tha Pashinian.
Pashinian ka udhëhequr protestat që kanë çuar në dorëheqjen e kryeministrit Serzh Sarkisian javën e kaluar.
