Ndërlidhjet

Putin do të diskutojë për K.Veriore me liderët aziatikë


Presidenti rus, Vladimir Putin.

Presidenti rus, Vladimir Putin pritet të zhvillojë bisedime me liderët aziatikë këtë javë, në të cilat do të përfshihet edhe programi bërthamor i Koresë Veriore, në kohën kur Phenjani ka ndalur përpjekjet për të ulur tensionet me Uashingtonin.

Putin do të takohet me kryeministrin japonez, Shinzo Abe, kryeministrin e Kinës, Xi Jinping dhe kryeministrin e Koresë Jugore, Lee Nak-yeon në qytetin lindor të Rusisë, Vladivostok, i cili është nikoqir i Forumit Ekonomik Lindor më 11-13 shtator.

Në takimin e tij më 10 shtator me kryeministrin Abe, Putin pritet të fokusohet në “rritjen e bashkëpunimit ekonomik dhe shkëmbimit tregtar”, si dhe në këmbimin e pikëpamjeve për situatën në “Gadishullin Korean”, ka thënë ndihmësi i lartë për politike të Jashtme i Putinit, Yury Ushakov.

Abe në anën tjetër u ka thënë gazetarëve më 10 shtator se ai dhe Putin po ashtu do të diskutojnë edhe për një konflikt për Ishujt Kurile, territor të cilin të dyja shtetet e emërojnë ndryshe.

Një zyrtare e lartë e Dhomës së Lartë të Parlamentit të Rusisë ka njoftuar se në këtë forum është ftuar edhe lideri verikorean, Kim Jong Un, mirëpo se ai nuk do të jetë pjesë e këtij organizimi.

Takimi në Vladivostik vjen vetëm një javë para samitit të planifikuar në mes të dy Koreve, që pritet të organizohet më 18-20 shtator në Phenjan.

Uashingtoni ka shprehur zhgënjim për mungesë të përparimit në procesin e denuklearizimit nga ana e Koresë Veriore, ndonëse presidenti amerikan, Donald Trump ka përshëndetur vendimin e Phenjanit për të mos shfaqur raketat balistike ndërkontinentale në paradën e madhe ushtarake për nder të 70 vjetorit të shtetësisë, që kanë shënuar verikoreanët më 9 shtator.

XS
SM
MD
LG