Ndërlidhjet

Vendimi për Rrafshnaltën e Golanit: SHBA përballet me kritika


Rrafshnalta e Golanit

Shtetet e Bashkuara u përballën me kritika në një takim të Këshillit të Sigurimit të Kombeve të Bashkuara, për shkak të vendimit të presidentit amerikan, Donald Trump, për të njohur sovranitetin e Izraelit mbi Rrafshnaltën e Golanit.

Departamenti për Punë të Jashtme i Bashkimit Evropian tha se ka qenë "qëndrim unanim" i të 28 vendeve anëtare të BE-së për të respektuar rezolutën e OKB-së, e cila e identifikon Rrafshnaltën e Golanit si territor të pushtuar dhe kundërshton aneksimin e tokës me forcë.

Zëvendësambasadori rus në OKB, Vladimir Safronkov, tha se veprimi i Uashingtonit mund të ushqejë trazira në Lindjen e Mesme.

Forcat izraelite e kanë pushtuar dhe marrë Rrafshnaltën e Golanit nga Siria në fazat e fundit të Luftës Gjashtëditëshe në vitin 1967.

Më 25 mars, Trump nënshkroi një deklaratë, me të cilën e njohu këtë rajon si territor izraelit, duke bërë kështu një kthesë të madhe në politikën amerikane.

Në vitin 2017, Trump e njohu edhe Jerusalemin si kryeqytet të Izraelit dhe urdhëroi zhvendosjen e ambasadës amerikane atje nga Tel Avivi.

Ky vendim u dënua nga palestinezët, të cilët e duan Jerusalemin Lindor për kryeqytet të shtetit të tyre të ardhshëm.

Lexoni edhe këtë:

Vendet arabe dhe Rusia kundër vendimit të Trumpit për Rrafshnaltën e Golanit

XS
SM
MD
LG