Ndërlidhjet

Hong Kongu tërheq projektligjin për ekstradim


Shefja ekzekutive e Hong Kongut, Carrie Lam.

Shefja ekzekutive e Hong Kongut, Carrie Lam ka tërhequr projekligjin për ekstradim, që ka nxitur protesta për disa muaj, duke thënë se shpreson që ky territor kinez të mos përballet më me këtë situatë.

Megjithatë, aktivistët pro-demokracisë kanë thënë se një vendim i tillë nuk do t’i japë fund krizës.

Në një transmetim televiziv, Lam është zotuar se “qeveria do të tërheqë zyrtarisht projektligjin në mënyrë që t’iu përgjigjet shqetësimeve publike”.

Ajo është zotuar se bashkë me zyrtarë tjerë “do t’i drejtohen komunitetit për të nisur dialog të drejtpërdrejtë”, duke shtuar se “neve na duhet që patjetër të adresojmë pakënqësitë në shoqëri dhe të gjejmë zgjidhje”.

Ende nuk është bërë e qartë nëse përmbushja e një prej kërkesave të protestuesve do të jetë e mjaftueshme për marshuesit që të ndalin organizimet.

“Shumë pak, shumë vonë”, ka thënë aktivisti pro demokracisë, Joshua Wong, në llogarinë e tij në rrjetin social, Facebook.

Edhe protestues tjerë kanë qenë të mendimit të njëjtë.

Miliona banorë të Hong Kongut u janë bashkuar protestave publike, të cilat kanë vështirësuar funksionimin e sektorëve publikë dhe kanë mbyllur aeroportin e Hong Kongut për disa ditë.

Në mesin e kërkesave tjera të banorëve të Hong Kongut janë edhe realizimi i reformës zgjedhore, lirimi i të gjithë protestuesve të arrestuar, një hetim i pavarur për veprimet e policisë si dhe tërheqja e shprehjes “rebelues” kur përmenden protestat.

Zyrtarët kinezë kanë mohuar se do të garantojnë siguri në këtë rajon.

Hong Kongu, territor kinez, funksionon sipas organizimimit, “një shtet, dy sisteme”.

XS
SM
MD
LG