Ambasadori amerikan në Kosovë, Philip Kosnett ka thënë përmes një postimi në Twtter se “është i kënaqur” që Kuvendi i Kosovës do të mbajë të mërkurën senacë për votimin e mocionit të mosbesimit ndaj qeverisë.
“Siç i kam thënë kryeministrit sot, është e rëndësishme që Kuvendi dhe të gjitha institucionet e Kosovës të respektojnë Kushtetutën”, ka thënë Kosnett.
Kryesia e Kuvendit të Kosovës vendosi që seanca për mocionin e mosbesimit të mbahet të mërkurën, duke nisur nga ora 11:00, pavarësisht shqetësimeve lidhur me koronavirusin.
Lidhja Demokratike e Kosovës ka iniciuar mocionin e mosbesimit ndaj Qeverisë Kurti dhe po mbështetet edhe nga partitë opozitare.
LDK-ja – që është pjesë e koalicionit qeverisës – nuk u pajtua me vendimin e kryeministrit, Albin Kurti për të shkarkuar Agim Veliun nga posti i ministrit të Brendshëm. Po ashtu, LDK ka kundërshtuar qasjen e Kurtit, sa i përket heqjes së taksës 100 për qind ndaj produkteve nga Serbia dhe Bosnje e Hercegovina, duke kërkuar që kjo taksë të hiqet plotësisht dhe pa kushte, ashtu siç ka kërkuar SHBA-ja.
