Në Kosovë u konfirmuan të hënën edhe 55 raste të reja me koronavirus dhe katër viktima.
Shifrat u bënë publike nga drejtori i Institutit Kombëtar të Shëndetësisë Publike të Kosovës, Naser Ramadani.
Në një konferencë për media në Prishtinë, ai tha se rastet e reja rezultojnë nga testimi i 574 mostrave.
“Mund t'ju them se kemi rënie të dukshme të situatës epidemiologjike”, tha Ramadani, duke njoftuar edhe për shërimin e 150 pacientëve.
Me shifrat e fundit, numri i përgjithshëm i të infektuarve me koronavirus në Kosovë arrin në 14,692.
Prej tyre, 600 pacientë kanë humbur jetën, ndërsa 11,585 janë shëruar.
Aktive mbeten edhe 2,507 raste.
Ushtruesi i detyrës së drejtorit të Shërbimit Spitalor dhe Klinik Universitar të Kosovës, Valbon Krasniqi, njoftoi se në Qendrën Klinike Universitare të Kosovës dhe në spitalet rajonale aktualisht janë duke u trajtuar 319 pacientë, që janë konfirmuar ose dyshohet se janë të infektuar me koronavirus.
