Të paktën 19 civilë janë vrarë në një sulm me makinë-bombë në një qytet verior sirian të kontrolluar nga rebelët e mbështetur nga Turqia, raporton BBC.
Tetëdhjetë persona të tjerë u plagosën kur automjeti shpërtheu pranë një stacioni autobusi në al-Bab, rreth 40 kilometra në veri-lindje të qytetit Alepo.
Ekipet e Shpëtimit nga Helmetat e Bardha thanë se ende janë në kërkim të të mbijetuarve në rrënojat e ndërtesave të dëmtuara.
Nuk dihet ende kush qëndron prapa këtij sulmi.
Sidoqoftë, ka pasur një numër sulmesh në al-Bab që kur u mposht grupi ekstremist, Shteti Islamik (IS) dhe ky rajon u vendos nën kontrollin e rebelëve dhe trupave turke më 2017.
Në nëntorin e kaluar një sulm la 18 të vdekur. Autoritetet turke fajësuan militantët e Njësive të Mbrojtjes së Popullit Kurd të Sirisë (YPG).
Ankaraja thotë se kurdët në Siri, që i përkasin Njësiteve për Mbrojtjen e Popullit kanë lidhje me militantët kurdë në Turqi të Partisë së Punëtorëve të Kurdistanit (PKK) që i konsideron organizatë terroriste.
Mirëpo SHBA-ja pretendon se YPG-ja, e cila i ka ndihmuar në mposhtjen e grupit militant, Shtetit Islamik në Siri, është subjekt i ndarë nga PPK-ja.
Dy zyrtarë të lartë të Kombeve të Bashkuara dënuan incidentin e ndodhur të martën (6 tetor).
Imran Riza, koordinator humanitar për Sirinë dhe Kevin Kennedy, koordinator rajonal humanitar për krizën në Siri, shprehën ngushëllimet e tyre të thella për familjet e viktimave dhe u kërkuan të gjitha palëve në konfliktin e Sirisë tu përmbahen detyrimeve të tyre për të garantuar sigurinë e civilëve.
