Forcat besnike të Moamer Gadafit kanë ripushtuar sot tre qytete në Lindje të Libisë, teksa fuqitë botërore po e konsiderojnë armatimin e kryengritësve.
Besnikët e Gadafit të mbështetur nga tanket dhe artileria kanë arritur në paralagjet e qytetit Axhdabia, 160 km në lindje të Bengazit, pasi i ripushtuan qytetet Ras Lanuf, Ukailla dhe Brega.
Kundërofenziva e fundit e Gadafit erdhi një ditë pasi kryengritësit avancuan 100 km në lindje të qytetit Sirte, vendlindjen e udhëheqësit libian.
Në perëndim, besnikët e Gadafit ende e mbajnë të rrethuar qytetin Misrata.
Ndërkohë, SHBA dhe Britania thanë se nuk e përjashtojnë mundësinë e armatosjes së kryengritësve.
Ministri i jashtëm rus, Sergei Lavrov, tha se Moska beson se fuqitë e huaja nuk kanë të drejtë t'u dërgojnë armë kryengritësve në bazë të rezolutës së Këshillit të Sigurimit.
