NATO refuzoi të kërkojë falje për sulmin vdekjeprurës ajror ndaj tankeve të rebelëve libianë, duke sqaruar se situata në tokë ka qenë "ekstremisht fluide".
Sulmi i NATO-s gabimisht e goditi një tank të rebelëve afër qyteti lindor Brega më 7 prill, duke vrarë dy kryengritës. Brega ka qenë fokusi i luftimeve të përditshme ndërmjet rebelëve dhe besnikëve të Gadafit.
Kundëradmirali Rasell Harding, zv/komandant i NATO-s në operacionet në Libi, tha se para të enjtes aleanca nuk kishte informacione se rebelët po përdornin tanke.
"Nuk po kërkoj falje. Situata në teren ishte ekstremisht fluide dhe mbetet e tillë. Deri dje nuk kishim informacion se forcat e opozitës po përdornin tanke", tha Harding.
Ndërkohë, kryengritësit libianë e kanë mirëpritur marrëveshjen paqësore të Turqisë, e cila bën thirrje për armëpushim dhe kërkon që forcat besnike të Moamer Gadafit të tërhiqen nga qytetet e rrethuara në perëndim të vendit.
Udhëheqësit e kryengritësve thanë se ata janë të gatshëm të pranojnë propozimin turk nëqoftëse Gadafi dhe familja e tij e braktisin vendin.
Kryeministri turk Rexhep Taip Erdogan tha se propozimi do të diskutohet në takimin mbi Libinë që javën tjetër do të mbahet në Katar. Ai gjithashtu e siguroi opozitën libiane se Turqia i mbështet kërkesat e tyre.