Ndërlidhjet

SERBËT NË MITROVICË PROTESTUAN KUNDËR PLANIT TË AHTISAARIT


Rrahman Paçarizi

Përfaqësues të serbëve të Kosovës që kanë folur para disa mijëra protestuesve në pjesën veriore të Mitrovicës, thanë se plani i kryenegociatorit ndërkombëtar për statusin e Kosovës, Martti Ahtisaari, është krejtësisht i papranueshëm dhe do hedhur poshtë. Marko Jakshiq, anëtar i Ekipit Negociues të Serbisë, tha se në planin e Ahtisaarit nuk ka asgjë të mirë për Serbinë dhe për serbët e Kosovës. “Ata duan të na marrin edhe spitalet, shkollat dhe sistemin financiar, ndërsa shqiptarëve u kanë dhënë gjithçka, edhe Kushtetutën, himnin dhe atribute të tjera shtetërore, e edhe vetë shtetin tonë”, tha Jakshiq, duke iu drejtuar masës së protestuesve, kryesisht nga veriu i Kosovës. Ai tha se pesë komunat që janë dedikuar për serbët, janë në fakt pesë rezervate, dhe i ka ftuar serbët për qetësi dhe unitet, duke theksuar se Kosova kurrë nuk do të bëhet e pavarur, përderisa Serbia të mos pajtohet për një gjë të tillë. “Edhe 75 komuna të na i japin, asgjë nuk na duhen, pasi në një shtet monstrum nuk na duhen asgjë”, tha Jakshiq.
Kryetari i Komunës së Zveçanit, Dragisha Miloviq, tha se me planin e Ahtisaarit synohet grabitja e një pjese të territorit të shtetit të njohur ndërkombëtarisht. Ahtisaari ofron që të jemi pakicë kombëtare dhe të mos kemi kurrfarë lidhjesh me Serbinë, por ne e porosisim atë se nuk do ta pranojmë planin e tij, tha Miloviq. “Ne e hedhim poshtë këtë plan të Ahtisaarit, pasi nuk është plan i kompromisit dhe nuk merr parasysh interesat e shtetit të Serbisë”, theksoi Miloviq. Nga kjo protestë i është dërguar apel Beogradit zyrtar, që sa më shpejt ta formojë Qeverinë, Kuvendin e ri dhe Ekipin Negociues, që të mund t’i mbrojnë në mënyrën e duhur interesat kombëtare. Në protestë kanë folur edhe kryetarët e Komunave të Zubin Potokut dhe Leposaviqit, si dhe kryetari i Këshillit Nacional Serb për veriun e Kosovës, Milan Ivanoviq. Ky i fundit tha se plani është i papranueshëm dhe paralajmëroi protestë të serbëve të Kosovës para Ambasadës Amerikane në Beograd, më 27 shkurt. Ai tha se po ashtu, do të formohet një delegacion i serbëve të Kosovës, që do të takojë nivele të ndryshme të udhëheqjes në Beograd, për t’i njohur ata me qëndrimin e serbëve të Kosovës lidhur me planin e Ahtisaarit.
Protesta e sotme që është mbajtur në afërsi të lumit Ibër, që aktualisht ndan qytetin e Mitrovicës në pjesën jugore me shumicë shqiptare dhe në pjesën veriore me shumicë serbe, ka kaluar pa ndonjë incident.
XS
SM
MD
LG