KATËRSHJA E FUQISHME E BE-SË KËRKON VENDOSMËRI MBI KOSOVËN

"Guardian"

Katërshja e fuqishme e Bashkimit Evropian është duke bërë trysni për të zbatuar dhe mbikëqyrur pavarësinë në Kosovë, pa pasur një mandat të ri nga Kombet e Bashkuara, duke rrezikuar kësisoj të përplaset me Rusinë dhe të përballet me një kundërshtim të rreptë të Serbisë, e cila është zotuar se nuk do të heqë dorë nga Kosova. Duke iu referuar një letre, të cilën ministri i Jashtëm britanik, gjerman, francez dhe italian, ia kanë dërguar liderëve evropianë, katërshja ka kërkuar nga 27 qeveritë të dërgojnë një mesazh të qartë për Kosovën, duke u pajtuar mbi funksionalizimin e misionit të Bashkimit Evropian, i cili do të merrej me zbatimin e planit për pavarësinë, të hartuar nga i dërguari Martti Ahtisaari. Por, të 27 vendet anëtare vazhdojnë të mbesin të ndara mbi Kosovën, edhe pas disa muaj përpjekjesh për arritjen e konsensusit. Katërshja e madhe e BE-së do të jetë e para së bashku me amerikanët, në njohjen e shtetësisë së Kosovës, pas deklaratës mbi pavarësinë, të cilën udhëheqësit shqiptarë në Kosovë pritet ta bëjnë brenda disa javësh. Letra, të cilën kjo e përditshme thotë se e posedon, kërkon që në samitin e sotëm të BE-së të përcaktohet rruga për zbatimin e planit të pavarësisë në fillimin e hershëm të vitit të ardhshëm, duke i shpallur negociatat midis Kosovës dhe Serbisë të përfunduara, duke vlerësuar se statusi i Kosovës duhet të vendoset urgjentisht dhe se Bashkimi Evropian do të ketë një rol udhëheqës në zbatimin e zgjidhjes. Kuarteti i ministrave të Jashtëm evropian në këtë kuadër ka thënë: "Duhet të jemi realistë mbi mundësitë shumë të vogla për arritjen e një niveli të nevojshëm konsensusi në Këshillin e Sigurimit". Disa shtete anëtare të bllokut evropian, siç është Qiproja, Greqia dhe Sllovakia, vazhdojnë ta kundërshtojnë njohjen e shtetësisë së Kosovës, pa pasur një pajtueshmëri nga Serbia. Vendet tjera, sikur Holanda për shembull, janë të shqetësuara mbi bazën ligjore ndërkombëtare të planit, të cilin e mbështesin katër qeveritë e fuqishme. Megjithatë, ka një pajtueshmëri të përgjithshme se misioni i Bashkimit Evropian do të mund të vendoset në kuadër të Rezolutës 1244 të Këshillit të Sigurimit. Konflikti ligjor do të përqendrohet në zbatimin e planit të Ahtisaarit mbi bazën e kësaj rezolute, me Serbinë dhe Rusinë që do të insistojnë në një mandat të ri nga Kombet e Bashkuara dhe disa vende anëtare të BE-së, të cilat do të mund t'i ndanin shqetësimet në këtë drejtim. John Sawers, ambasadori britanik në Kombet e Bashkuara në New York, nuk mendon se Këshilli i Sigurimit do të jetë në gjendje të arrijë një marrëveshje për të ecur përpara dhe në këtë rast, organizatat tjera janë ato që duhet ta marrin përgjegjësinë.