Zyrtarë në Bashkimin Evropian kanë thënë se janë të "befasuar dhe të shqetësuar" për deklaratën e nënkryetarit të Partisë radikale Serbe, Tomisllav Nikoliq se me kryeministrin Vojisllav Koshtunica janë marrë vesh që në Kuvendin e Serbisë të shpallet okupim i Kosovës në rast se imponohet pavarësia e Kosovës dhe se Serbia, "me të gjitha mjetet" atje duhet ta mbrojë sovranitetin e saj. Burime serbe nga Brukseli raportojnë se funksionarët e BE-së, në reagimin e parë, kanë theksuar se është vështirë të vlerësohet serioziteti i këtyre porosive, duke marrë parasysh se deri tash nuk ka pasur komente zyrtare ose konfirmime nga qeveria e Serbisë.
