Ndërlidhjet

Trump fton Putinin në Uashington


Donald Trump dhe Vladimir Putin, Helsinki, 15 korrik, 2018.
Donald Trump dhe Vladimir Putin, Helsinki, 15 korrik, 2018.

Zëdhënësja e Shtëpisë së Bardhë, Sarah Sanders, tha se presidenti i Shteteve të Bashkuara, Donald Trump, ka urdhëruar zyrtarët të ftojnë presidentin rus, Vladimir Putin, në Uashington.

Në një postim në Twitter, Sanders tha se Trump ka urdhëruar këshilltarin e sigurisë kombëtare, John Bolton, ta bëjë ftesën për në vjeshtë.

Lajmi vjen pak ditë pas samitit të parë Trump-Putin që u zhvillua më 16 korrik, në Helsinki të Finlandës, e që shkaktoi zemërim në SHBA për shkak të dështimit të Trumpit për t’iu kundërvënë publikisht Putinit, për ndërhyrjen e Moskës në zgjedhjet presidenciale në SHBA, më 2016.

Ligjvënësit amerikanë dhe zyrtarët e tjerë po ashtu nuk janë informuar ende se për çfarë kanë diskutuar Trump dhe Putin në takimin privat, me vetëm praninë e përkthyesve.

Madje, edhe drejtori i inteligjencës kombëtare i Trumpit, Dan Coats, tha se nuk e di se çfarë ka ndodhur në Helsinki.

Ftesa e planifikuar për në Uashington pritet të shihet si fitore nga Putini, i cili vizitën e fundit zyrtare në SHBA e ka realizuar në korrik të vitit 2007.

Të enjten, edhe Trump, edhe Putin e cilësuan takimin e parë të tyre si sukses, ndërsa fajësuan forcat në SHBA për përpjekje për të minuar arritjet e tyre. Pavarësisht kritikave, Trump tha se e mirëpret edhe një takim të dytë me liderin rus.

Udhëheqësi i demokratëve në Senatin amerikan, Chuck Schumer, e kritikoi menjëherë ftesën e planifikuar.

“Derisa nuk dimë se çfarë ka ndodhur në atë takim dyorësh në Helsinki, presidenti nuk duhet të ketë më ndërveprime sy më sy me Putinin, as në Shtetet e Bashkuara, as në Rusi, as gjetkë”, tha Schumer.

Vizita e fundit zyrtare e një presidenti rus në Shtetet e Bashkuara është bërë në qershor të vitit 2010 nga Dmitry Medvedev, tani kryeministër i Rusisë.

Sipas kritikëve, Trumpit i është dhënë mundësi e mjaftueshme në konferencën e përbashkët të shtypit për të qortuar Putinin, lidhur me ndërhyrjen ruse në zgjedhjet amerikane, porse ai ka vendosur të pranojë mohimet e Putinit përballë konstatimeve të agjencive amerikane të inteligjencës.

Trump, më pas, ka thënë se është keqinterpretuar.

Video nga takimi në Helsinki:

Trump: Me Rusinë kemi 90% të armëve bërthamore
Ju lutem prisni

No media source currently available

0:00 0:00:25 0:00

Shtëpia e Bardhë tha po ashtu se ka refuzuar propozimin e Putinit që autoritetet ruse të jenë të pranishme në marrjen në pyetje të amerikanëve që i akuzojnë për “aktivitete të paligjshme”. Në këmbim, Putini ka sugjeruar se mund të lejojë qasjen e amerikanëve te 12 rusët që SHBA-ja i akuzon për ndërhyrje në zgjedhjet e saj.

"Ka qenë një propozim i bërë me sinqeritet nga presidenti Putin, por presidenti Trump nuk është dakord me të", tha zëdhënësja e Shtëpisë së Bardhë, Sarah Sanders.

Të mërkurën, Zyra e Prokurorit të Përgjithshëm në Rusi ka listuar disa amerikanë që dëshiron t’i marrë në pyetje për, siç thuhet, “aktivitete të paligjshme”, përfshirë Michael McFaul, i cili ka qenë ambasador i SHBA-së në Rusi gjatë administratës së ish-presidentit Barack Obama.

“Kjo nuk do të ndodhë”, tha sekretari amerikan i Shtetit, Mike Pompeo, për televizionin CBN News .

Përgatiti: Valona Tela
XS
SM
MD
LG