Zyrtarë të Qeverisë së Kosovës dhe ekspertë për çështje të integrimeve evropiane në Prishtinë pohojnë se mosnjohja e shtetësisë së Kosovës nga të gjitha vendet e Bashkimit Evropian, po vështirëson relacionet Kosovë-BE, si dhe mund të ndikojë negativisht në procesin e integrimit të Kosovës në këtë mekanizëm.
Sidoqoftë, ata shprehin bindjen se rruga e Kosovës, sikurse e të gjithë Ballkanit Perëndimor, është në BE, pavarësisht problemeve të natyrave të ndryshme që mund të dalin.
Kryeshefi i Agjencisë për Koordinim, Zhvillim dhe Integrime Evropiane në kuadër të Qeverisë së Kosovës, Edon Cana, thotë se edhe për shkak të mosnjohjes së Kosovës prej 5 nga gjithsejtë 27 vendet anëtare të BE-së, Kosova po has në probleme në disa sfera.
“Është e vërtetë që mosnjohja nga 5 shtetet e Bashkimit Evropian e vështirëson pozitën e Kosovës në relacion me Bashkimin Evropian, por ne jemi të bindur që me përmbushjen e kritereve teknike, ne do të jemi në një pozitë shumë më të favorshme”.
“Besojmë që perspektiva e qartë politike e Kosovës për integrimin në Bashkimin Evropian është theksuar që në konferencën në Thessaloniki e deri më sot”, u shpreh Cana.
Cana e quan të padiskutueshëm integrimin e të gjithë Ballkanit Perëndimor në Bashkimin Evropian - çështje kjo e cila, sipas tij, do të varet kryesisht nga aspekti kohor.
“Ballkani Perëndimor nuk ka alternativë. Ne mendojmë se së shpejti të gjitha shtetet e tjera, përfshirë dhe Kosovën, do të jenë në gjendje që ta nënshkruajnë apo të ratifikojnë marrëveshjen e stabilizim-asociimit”, konsideron ai.
Kjo gjë, sipas ekspertit të së drejtës evropiane, Bardhyl Hasanpapaj, nuk do të jetë e mundshme në kuptimin klasik, pikërisht për shkak të mungesës së plotë të njohjes së Kosovës nga Bashkimi Evropian. Mirëpo, Hasanpapaj shprehu bindjen se BE-ja do të gjejë modalitete në këtë drejtim.
“Bashkimi Evropian është një organizatë që është e njohur për invencionet e saj dhe me siguri se po mendon të gjejë rrugë të tjera për të tejkaluar këtë pengesë, e cila është shumë serioze. Nga e drejta ndërkombëtare klasike buron dhe vetë Bashkimi Evropian, i cili vepron në kuadër të së drejtës ndërkombëtare”.
“Si e tillë, kjo e drejtë e bën të pamundur, pa pëlqimin e 5 shteteve që akoma nuk e kanë njohur pavarësinë e Kosovës, lidhjen e ndonjë marrëdhënieje klasike kontraktuale me Kosovën”, tha ai, duke shtuar se përpjekjet e Bashkimit Evropian për vënien e raporteve kontraktuale me Kosovën kanë për qëllim kanalizimin e mjeteve financiare në vend përmes konsensusit.
Me menaxhimin e këtyre mjeteve pastaj, siç tha Hasanpapaj, do të merrej Komisioni Evropian.
Ndryshe, çështja e integrimeve evropiane në Kosovë mbetet akoma temë e vazhdueshme debatesh. Disa thonë se Kosova është ende larg në rrugën e saj evropiane, të tjerët, ndërkaq, pohojnë se ritmi me të cilin po ecën Kosova, është i pranueshëm.
