Armët pa leje në duart e qytetarëve të Kosovës, që, sipas organizatave të ndryshme ndërkombëtare, llogaritet të jenë rreth 300 mijë, paraqesin rrezik serioz për qytetarët.
Kështu u tha sot, gjatë takimit të parë të grupit punues për hartimin e strategjisë për grumbullimin e armëve pa leje.
Hartimi i kësaj strategjie, sipas zyrtarëve qeveritarë, ka për qëllim gjetjen e formave më të mira për zvogëlimin e numrit të armëve. Kjo strategji, sipas tyre, pritet të përfundojë brenda 2 muajsh. Ndërkohë, në përpilimin e saj do të punojnë autoritetet vendore dhe ndërkombëtare të sigurisë në Kosovë.
Ministri i Punëve të Brendshme, Zenun Pajaziti, thotë se autoritetet janë të vetëdijshme që hartimi i strategjisë është vetëm fillimi i punës. Ai beson se me ndihmën e kësaj strategjie dhe më pas me miratimin e Ligjit për armët, do të shënohen përparime.
Ai konsideron se të gjitha këto shifra do të bëhen më reale pas hartimit të kësaj strategjie, e cila thuhet se do të mund të ketë efekte pozitive në përmirësimin e kësaj çështjeje.
Megjithatë, ministri Pajaziti konsideron se tani qytetarët nuk kanë as edhe një motiv për mbajtjen e armëve në shtëpitë e tyre.
Ndërsa, Astrit Istrefi, koordinator i organizatës "Safer World", që në bashkëpunim me Forumin për Iniciativë Qytetare, ka publikuar raportin për siguri dhe përdorimin e armëve të vogla dhe të lehta në Kosovë, thotë se numri i përafërt i armëve ilegale është rreth 300 mijë.
Sipas këtij hulumtimi, zoti Istrefi thekson se numri më i madh i armëve pa leje është në qytetin e Mitrovicës.
“Rreziku çdoherë bazohet në disa indikatorë. Dhe, indikatorët janë rastet e incidenteve. Nga hulumtimet tona del se armët mund të përdoren në periudha të ngritjes së tensioneve. Ky është një indikator që duhet të merret në hartimin e strategjisë”, thotë zoti Istrefi.
Për disa qytetarë, ulja e numrit të armëve që mbahen nga qytetarët, është sfidë për Kosovën.
“Përdorimi i armëve është mjaft shqetësues, pasi që shumë të rinj, në mënyrë shumë të paligjshme, i mbajnë ato. Përdorimi i armëve është bërë traditë në Kosovë. Ato përdoren në shumë ahengje e që në fakt nuk është fare e nevojshme”, shprehet Lushtaku.
Ndërsa, Njazi Biqku, thotë:
“Tani kur ne jemi shtet, mbajtjen e tyre nga ana e qytetarëve nuk e shoh aspak të arsyeshme. Është e palogjikshme. Tani kemi policinë, e cila kujdeset për sigurinë tonë”, thotë ky qytetar.
Sidoqoftë, deri më tani, Qeveria, në bashkëpunim me KFOR-in dhe mekanizmat tjerë të sigurisë në Kosovë, ka ndërmarrë shumë iniciativa, të cilat kanë pasur për qëllim dorëzimin e armëve ilegale nga ana e qytetarëve.
