Anija luftarake amerikane ka arritur në portin e Batumit, për stërvitjen e përbashkët që do të zhvillohet ndërmjet Shteteve të Bashkuara dhe Gjeorgjisë, afër rajonit separatist të Abkhazisë.
Një ditë më herët, presidentit rus, Dimitri Medvedev, i është bërë mikpritje heroike gjatë vizitës së tij të parë si shef i Kremlinit në pjesën tjetër të shkëputur nga Gjerogjia, në Osetinë Jugore.
Medeved premtoi më shumë financime dhe ndihmë ushtarake për këtë territor, i cili e ka shpallur pavarësinë nga Tbilisi, pas invadimit të Moskës në Gjeorgji, vitin e kaluar.
Prej andej, Medvedev udhëtoi në Soçi, me ç’rast njoftoi se testi i nisjes së raketave balistike, i kryer nga një nëndetëse ruse, ka përfunduar me sukses.
Presidenti rus, mes tjerash, ka thënë se Tbilisi bart përgjegjësinë e plotë për luftën e verës së kaluar në Osetinë Jugore, ndërsa parashikoi se një ditë vetë populli gjeorgjian do t’i japë dënim të rëndë regjimit të Sakashvilit.
Por, zëdhënësi i Stejt Departamentit amerikan, Jan Kelli, ka ripërsëritur qëndrimin e Shteteve të Bashkuara për Gjeorgjinë.
“Fakti i vizitës së bërë Osetisë Jugore nga presidenti rus Medvedev, vë në pah dallimet fundamentale që kanë dy vendet për këtë çështje. Ju e keni parë presidentin Obama në vazhdimësi duke përsëritur mbështetjen për integritetin territorial të Gjeorgjisë”, tha Kelli.
Presidenti i Gjeorgjisë, Mikael Sakashvili, i cili me muaj deklaronte se invadimi nga ana e Rusisë ishte i pashmangshëm, gjatë një takimi që kishte me Këshillin e Sigurisë Kombëtare, ka thënë se kërcënimi për luftë me Moskën papritmas është zvogëluar.
“Të gjitha planet e tyre agresive për të ardhmen e afërt kanë dështuar. Lufta, të cilën ata e kanë imagjinuar, lufta që ata e kishin në plan dhe në ëndrrat e tyre, nuk do të ndodhë. Plani ushtarak për pushtimin e Gjeorgjisë nuk do të jetë i mundshëm të zbatohet në realitetin e ri gjeopolitik”, ka deklaruar Sakashvili.
Për realitetin e ri gjeopolitik, zyrtarët gjeorgjianë flasin veçanërisht pas vizitës së presidentit amerikan, Barak Obama, javën e kaluar në Moskë, dhe në prag të vizitës së nënpresidentit Xho Bajden, që do t’i bëjë Gjeorgjisë, javën e ardhshme.
Në lidhje me këtë vizitë, zëdhënësi i Stejt Departamentit, Jan Kelli, tha:
“Ne vazhdojmë të kërkojmë nga Rusia që të respektojë integritetin territorial të Gjeorgjisë, të lehtësojë stabilitetin në rajon, të marrë pjesë në procesin e Gjenevës, si dhe t’i zbatojë pikat e marrëveshjes për armëpushim, që është arritur më 12 gusht. Ne, po ashtu, u bëjmë thirrje të gjitha shteteve që të vazhdojnë të respektojnë integritetin territorial të Gjeorgjisë”, tha, mes tjerash, Kelli.
Lorenc Shets, udhëheqësi i zyrës së Grupit Ndërkombëtar të Krizave në Tbilisi, thotë se ka pasur ndryshim të dukshëm në tonin e zyrtarëve gjeorgjianë, që nga vizita e presidentit Obama në Moskë.
Pavel Felgenhauer, analist ushtarak në gazetën “Novaja Gazeta”, ka paralajmëruar me muaj se Moska ishte duke u përgatitur për një tjetër ndërhyrje ushtarake këtë verë.
Felgenhauer thotë se është i vetëdijshëm që presidenti Obama paralajmëroi Rusinë gjatë samitit në Moskë, por nuk shpreh bindjen se ky paralajmërim mund ta pengojë Kremlinin.
“Rusia ishte paralajmëruar se kjo ishte e papranueshme, por se çfarë do të thotë kjo, është çështje tjetër. Unë nuk jam i sigurt se sa i fuqishëm ka qenë paralajmërimi amerikan dhe sa seriozisht është pranuar nga Moska. Por, kjo ishte e vetmja mundësi. Ky samit ishte rasti i fundit për të shmangur luftën këtë verë”, u shpreh Felgenhauer.
Luftë apo jo? Asnjë porosi e Obamës nuk ishte e mjaftueshme për ta penguar Medvedevin qe të vizitojë Osetinë Jugore.
Ndërkohë, arritja e anijes në portin e Batumit është pritur me verë dhe muzikë. Komandanti Mark Oberli tha se stërvitjet detare të përbashkëta do të vazhdojnë, për të demonstruar angazhimin e përbashkët detar të Amerikës dhe Gjeorgjisë, si dhe për të ruajtur sigurinë.
