Udhëheqja ushtarake amerikane ka thënë se situata në Afganistan është emergjente, por beson se strategjia e presidentit Barak Obama do të funksionojë dhe se trupat amerikane do të qëndrojnë edhe më tej për të mundur ekstremistët e dhunshëm.
Duke folur në Pentagon, sekretari i mbrojtjes, Robert Gejts, tha se përpjekjet e Obamës, përfshirë edhe shtimin e 20 mijë trupave në Afganistan, janë në fillim të dhënies së efekteve dhe se duhet kohë për të pasur sukeses.
“Ne ende nuk i kemi në Afganistan të gjitha forcat që i ka autorizuar presidenti. Ne vetëm tani jemi në pozicion që të kemi në vend asetet, strategjinë apo qasjen ushtarake, në mënyrë që të fillohet me zbatimin e strategjisë”, tha Gejts.
Sekretrai Gejts nënvizoi se prania ushtarake amerikane në Afganistan është e domosdoshme për të luftuar terroristët. Ai nuk beson se Amerika duhet të tërheqë forcat jashtë vendit, edhe pse, sipas anketave, mbështetja e publikut për përfshirjen në konflikt po bie.
“Fakti se amerikanët mund të jenë lodhur duke i vënë në rrezik dhe në betejë bijtë dhe bijat e tyre, nuk është befasues. Mendoj se është e rëndësishme që të shohim, në muajt që vijnë, se strategjia e presidentit po jep rezultate”, tha Gejts.
Në të njëjtën konferencë për gazetarë, shefi i Shtabit të Ushtrisë Amerikane, admirali Majk Mullen, e ka përshkruar situatën si emergjente.
“Është çështje emergjente. Koha nuk është në anën tonë. Mendoj se ne e kuptojmë këtë dhe mendoj se do të rimarrim iniciativën”, tha Mullen.
Të dy zyrtarët kanë folur pasi që gjenerali Stejnli Mekristël, komandant amerikan në Afganistan, dorëzoi këtë javë strategjinë e luftës në Afganistan.
Kreu i forcave amerikane dhe i misionit të NATO-s e ka cilësuar situatën në këtë vend si serioze. Gjenerali amerikan, Stejnli Mekristël, në analizën e tij para komandantëve amerikanë dhe të aleancës theksoi se suksesi ishte i mundur në Afganistan me një strategji të re.
Mekristël aktualisht komandon mbi 100 mijë trupa në Afganistan, nga të cilët 63 mijë janë ushtarë amerikanë. Më shumë se gjysma e forcave amerikane janë dërguar në Afganistan pas ardhjes në Shtëpinë e Bardhë të presidentit Obama.