Presidenti i Rusisë Dimitri Medvedev sot do të takohet në Uashington me presidentin amerikan Barak Obama.
Bisedimet pritet të fokusohen në rritjen e vëllimit tregtar dhe investimeve.
Të mërkurën, Medvedev qëndroi në Luginën e Silikonit në Kaliforni, në kërkim të investimeve të teknologjisë së lartë.
Medvedev tha se ai dëshiron të sjellë më shumë inovacione teknologjike për ta diversifikuar ekonominë e Rusisë që varet nga nafta.
Obama dhe Medvedev do të diskutojnë edhe për Iranin dhe Korenë Veriore, kontrollin e armatimit dhe trazirat në Kirgizi, për të cilat të dy vendet duan që të gjendet zgjidhje.
Takimi i sotëm Obama-Medvedev do të jetë i shtati që kur presidenti amerikan e mori detyrën 17 muaj më parë.