Një faqe interneti e afërt me konservatorët tha se një granatë ka shpërthyer afër konvojit të presidentit Mahmud Ahmadinexhad në Iranin perëndimor.
Faqja, e cila besohet të jetë e afërt me kryetarin e parlamentit, Ali Larixhani, tha se shpërthimi i sotëm ndodhi në qytetin Hamedan kur Ahmadinexhad udhëtonte për të mbajtur një fjalim.
Raporti thotë se Ahmadinexhad nuk është lënduar dhe e ka mbajtur fjalimin, i cili është transmetuar në televizion.
Televizioni Al-Arabia raportoi se sulmuesi e kishte hedhur granatën përpara se të arrestohej.
Mirëpo televizioni shtetëror i Iranit Press TV tha se zyra e presidentit i ka quajtur të pavërteta pohimet për sulmin. Një televizion tjetër raportoi se shpërthimi ka qenë fyshekzjarre për të përshëndetur ardhjen e presidentit.