Presidenti i Iranit, Mahmud Ahmadinexhad u ka bërë thirrje palestinezëve që ta vazhdojnë luftën e armatosur kundër Izraelit, një ditë pasi udhëheqësit izraelitë dhe palestinezë u dakorduan që t'i vazhdojnë bisedimet e ndërmjetësuara nga SHBA-të.
"Çështja e Palestinës nuk mund të zgjidhet përmes bisedimeve me armiqtë e popullit palestinez. Rezistenca është mënyra e vetme për të shpëtuar palestinezët", ka thënë Ahmadinexhad.
Sekretarja e Shtetit, Hillari Klinton, e cila ishte mikpritëse e sesionit të parë të bisedimeve ndërmjet kryeministrit, Benjamin Netanjahu, dhe presidentit palestinez, Mahmud Abas, shprehu bindjen se përpjekja e fundit për të sjellë paqe në rajon mund të ketë sukses aty ku shumë të tjera kanë dështuar.
Netanjahu dhe Abas u dakorduan të takohen në 14-15 shtator, në praninë e sekretares Klinton.
