Shtetet e Bashkuara paralajmëruan se lidhjet me Venecuelën mund të tendosen edhe më tej pasi qeveria e presidentit Hugo Çavez formalisht e refuzoi të emëruarin e Uashingtonit për ambasador në Venecuelë.
Zëdhënësi i Departamentit të Shtetit, Filip Krouli, konfirmoi se qeveria e Venecuelës formalisht e ka hedhur poshtë emërimin e diplomatit veteran Lari Palmer për ambasador në këtë vend të Amerikës Latine.
Në seancën dëgjimore në Senatin amerikan, Palmer e kishte zemëruar Çavezin duke sugjeruar se morali është i ulët në armatën e Venecuelës, dhe se ai është i shqetësuar se rebelët kolumbianë kërkojnë strehim në Venecuelë.
Krouli tha se refuzimi i Palmerit do të ketë "konsekuenca" për marrëdhëniet Uashington-Karakas, por nuk dha detaje.