Ndërlidhjet

Kundër kushtëzimit të lirisë së lëvizjes


Jagnjenica, 24Oct2011

Jagnjenica, 24Oct2011


Forca shumëkombëshe e KFOR-it kundërshton vënien e kushteve nga ana e serbëve në lidhje me lirinë e lëvizjes në veri të Kosovës.

Një zëdhënës i KFOR-it në Prishtinë, Uve Novicki tha për Radion Evropa e Lirë se liria e lëvizjes duhet të arrihet për të gjitha palët, duke përfshirë si organizatat ndërkombëtare ashtu edhe gjithë popullin e Kosovës.

Reagimet nga KFOR-i vijnë në ditën kur përfaqësues të komunave paralele serbe në veri kanë dalë me disa qëndrime në lidhje me lirinë e lëvizjes në këtë pjesë.

Këta përfaqësues kanë marrë vendim që barrikadat nëpër rrugë të mbeten.

Ata i kanë kërkuar EULEX-it që si shkëmbim për mundësimin e qarkullimit nëpër rrugët në veri të Kosovës, ky mision të heqë dorë nga transporti dhe përkrahja logjistike për doganierët dhe policët kufitarë kosovarë në portat 1 dhe 31.

Përderisa për KFOR-in, këta përfaqësues të serbëve janë treguar më fleksibilë.

Pas takimit të kryetarëve të katër komunave paralele në veri, njëri nga liderët e këtyre strukturave, Sllavisha Ristiq tha se për EULEX-in ende nuk ka kushte që të qarkullojë lirshëm në veri të Kosovës.

Konsiderojmë se në këtë moment nuk janë krijuar kushtet që të lejojmë EULEX-in që të lëvizë lirshëm”, tha Ristiq, duke kërkuar që ky mision të heqë dorë nga transporti dhe mbështetja logjistike për doganierët dhe policët kufitarë të Kosovës.

Por, misioni i EULEX-it, në anën tjetër, porositë serbët që në afatin më të shkurtë kohor t’í heqin barrikadat.

Bllokimi i rrugëve nuk paraqet protestë paqësore dhe heqjen e tyre e pret jo vetëm EULEX-i, por edhe të gjitha vendet anëtare të BE-së, ka thënë zëdhënësja e këtij misioni, Irina Gudeleviq.

Liria e lëvizjes duhet të rivendoset në afatin më të shkurtë kohor dhe atë me heqjen e barrikadave, çka do të jetë në interes të banorëve lokalë dhe organizatave e misioneve ndërkombëtare, si KFOR-i, EULEX-i e të tjerë”, ka thënë zëdhënësja e EULEX-it.

Përfaqësuesit e serbëve i kanë dërguar letër edhe komandantit të KFOR-it, Erhard Drevs, të cilin e kanë ftuar të bisedojnë për gjetjen e një zgjidhjeje të pranueshme në lidhje me qarkullimin e ushtarëve të KFOR-it në veri dhe furnizimin e tyre në pikat kufitare.

Në lidhje me kërkesat e serbëve, zëdhënësi i KFOR-it, Uve Novicki tha se liria e lëvizjes vetëm për KFOR-in dhe jo për EULEX-in, nuk është e pranueshme.

Komandanti i KFOR-it u ka thënë shumë qartë kryetarëve të komunave në veri të Kosovës se liria e lëvizjes duhet të arrihet pa asnjë kusht për secilin, në çdo kohë. Kjo është shumë e qartë. Asgjë ndryshe nga kjo nuk është e pranueshme”, thotë zëdhënësi i KFOR-it, Uve Novicki.

Ai rikujton se edhe më herët u është bërë e qartë përfaqësuesve të komunave në veri, se liria e lëvizjes nuk mund të kushtëzohet.

Sidoqoftë, strukturat paralele në veri, zotohen se do të vazhdojnë me barrikadimin e rrugëve.

Një tjetër përfaqësues i këtyre strukturave, Radenko Nedelkoviq tha se serbët në veri janë të bashkuar dhe do të vazhdojnë me protesta deri në realizimin e qëllimeve.

Ne do ta vazhdojmë luftën tonë të qetë dhe se qytetarët duhet të vazhdojnë që t’í përgjigjen pozitivisht thirrjeve për barrikada dhe protesta paqësore deri në përmbushjen e qëllimeve”, tha Nedelkoviq.

E qëllimi kryesor është që serbët të mbeten në trevat e tyre dhe në kuadër të Serbisë, tha ai.

Barrikadat nëpër rrugët në veri të Kosovës janë vendosur nga serbët si reagim ndaj vendosjes së doganierëve dhe policëve kosovarë në pikat 1 dhe 31 në veri të vendit.

Pengesat rrugore u përforcuan pas 16 shtatorit, kur edhe autoritetet ndërkombëtare i dhanë mbështetje Qeverisë së Kosovës për marrjen nën kontroll të Jarinës dhe Bërnjakut.

KFOR-i ka bërë të ditur se pika kufitare 31, në Bërnjak, është e kalueshme, por megjithatë mbetet sfidë se si mund të qarkullohet nga kjo pikë për në Mitrovicë, pasi që strukturat ilegale të pushtetit atje në vazhdimësi vendosin barrikada të reja.

  • 16x9 Image

    Zijadin Gashi

    Zijadin Gashi, i lindur më 1973 në Prishtinë. Me gazetari ka filluar të merret që nga viti 1997, duke u angazhuar fillimisht nëpër mediat lokale. Si korrespondent i Radios Evropa e Lirë punon që nga maji i vitit 2001. Kryesisht ka mbuluar aktualitetin politik në Kosovë.

    Nga 1 shkurti 2016, është emëruar shef i Byrosë së Radios Evropa e Lirë, në Prishtinë. Ai është i martuar dhe ka 3 fëmijë.

Trego komentet

XS
SM
MD
LG