Ndërlidhjet

Pas nëntë raundesh të takimeve dhe gjithsej shtatë marrëveshjeve të arritura në kuadër të dialogut Prishtinë-Beograd, procesi i ardhshëm zgjedhor në Serbi pritet të ngadalësojë dinamikën e mbajtjes së takimeve të drejtpërdrejta ndërmjet palëve.

Megjithatë, në Bruksel thonë se rëndësi kruciale në muajt e ardhshëm do të jetë zbatimi i marrëveshjeve të arritura deri më tani.

Maja Kocijanciq, zëdhënëse e shefes së diplomacisë evropiane, Kethrin Eshton, thotë për Radion Evropa e Lirë se do të vazhdojnë kontaktet ndërmjet palëve dhe puna e grupeve punuese për zbatim.
Është e qartë se puna e grupeve punuese për zbatim do të vazhdojë, sepse zbatimi ka rëndësi kruciale për të gjithë.


“Është e qartë se puna e grupeve punuese për zbatim do të vazhdojë, sepse siç e kemi thënë në shumë raste dhe siç është konfirmuar nga këshilli, zbatimi ka rëndësi kruciale për të gjithë. Bashkimi Evropian do të mbetet ndërmjetësues dhe do të ketë kontakte të ngushta me të dyja palët”, thotë Kocijanciq.

Në mesin e marrëveshjeve të arritura ndërmjet palës kosovare e asaj serbe, ndër të tjera, hyn ajo për njohjen e diplomave universitare, regjistrin kadastral, lirinë e lëvizjes, menaxhimin e integruar të kufirit dhe marrëveshja për bashkëpunimin rajonal.

Pa precizuar temat e ardhshme që do të vihen në tryezën e diskutimit, Kocijanciq bën të ditur se do të flitet sërish për çështjen e energjisë dhe të telekomunikacionit, meqë për këto dy çështje, edhe pse ishte diskutuar në raundet paraprake, nuk është arritur pajtim ndërmjet palëve.

“Për shembull, çështjet të cilat janë diskutuar tashmë, por që nuk kanë rezultuar me marrëveshje, janë çështjet si telekomi dhe energjia”, thekson Kocijanciq.

Rëndësinë për gjetjen e zgjidhjeve për energjinë dhe telekomunikacionin e përmendi, ditë më parë, shefi i delegacionit serb, Borko Stefanoviq, duke thënë se ato do t’i nevojiten Serbisë për marrjen e datës për nisjen e negociatave për anëtarësim në Bashkimit Evropian.

Mirëpo, Stefanoviq u tha mediave serbe se ende nuk janë “vendosur kufijtë me Kosovën“ dhe se Serbia “nuk e ka dhënë Kosovën“ në shkëmbim të statusit të kandidatit për anëtarësim në BE.

Sonja Biserko

Sonja Biserko

Kryetarja e Komitetit të Helsinkit në Beograd, Sonja Biserko, thotë se retorika aktuale politike e Beogradit rreth çështjeve që kanë të bëjnë me Kosovën, nuk do të ndalet në prag të fushatës zgjedhore. Shumëçka në ecurinë e mëtejmë të dialogut, sipas saj, do të varet nga qeveria e re serbe dhe nga plani i Serbisë për integrim evropian.

“Shumëçka do të varet nga ajo nëse qeveria e ardhshme do ta shfrytëzojë statusin e vendit kandidat si një mundësi; se a do ta bëjë integrimin evropian prioritet, të cilit do t’i japë substancën e një politike evropiane”, vlerëson Biserko për Radion Evropa e Lirë.

Zgjedhjet serbe, përkatësisht mbajtja e zgjedhjeve lokale në territorin e Kosovës, vlerësohet të jenë proces i radhës, përmes të cilit BE-ja dëshiron të testojë “konstruktivitetin” e shtetit serb në raport me Prishtinën.

Trego komentet

XS
SM
MD
LG