Ndërlidhjet

Mijëra egjiptianë mbushin Sheshin Tahrir


Sheshi Tahri, 22 qershor 2012.

Mijëra egjiptianë janë mbledhur në Sheshin Tahrir të Kajros për të protestuar kundër zgjatjes së pushtetit ushtarak.

Protestat e së premtes ndodhin në kohën kur egjiptianët vazhdojnë të presin rezultatet zyrtare të zgjedhjeve presidenciale, që u zhvilluan fundjavën e kaluar.

Gjatë demonstratës, kleriku që ka udhëhequr lutjet e së premtes në shesh, tha se Muhamed Mursi, kandidat i Vëllazërisë Myslimane, është fitues i qartë i zgjedhjeve.

Ahmed Shafik, i cili ka qenë kryeministri i fundit në regjimin e presidentit të përmbysur, Hosni Mubarak, ka thekuar sërish se ai është fitues dhe ka akuzuar Vëllazërinë Myslimane se “po bën përpjekje të frikësojë zyrtarët zgjedhorë”.

Javën e kaluar, Këshilli Ushtarak i ka dhënë vetes pushtet legjislativ dhe ekzekutiv me shpërndarjen e parlamentit të dominuar nga islamistët.

Këshilli Ushtarak ka marrë udhëheqjen e vendit pas rrëzimit të Mubarakut në kryengritjen e vitit të kaluar.
XS
SM
MD
LG