Nën kryesimin e deputetes më të vjetër, Flora Brovina dhe deputetes më të re, Teuta Rugova, ka filluar vazhdimi i seancës konstituive e Kuvendit të Kosovës me pikën e vetme, zgjedhja e kryetarit dhe nënkryetarëve.
Interesim për të përcjellë këtë seancë ka jo vetëm nga mediat por edhe nga kori diplomatik në Prishtinë.
Në pjesën e vëzhguesve të seancave të Kuvendit janë ulur edhe ambasadorja amerikane në Prishtinë, Tracey Ann Jacobson dhe personalitete tjera ndërkombëtare.
Në emër të Partisë Demokratike të Kosovës, deputeti Hajredin Kuçi ka nominuar për postin e kryetarit të Kuvendit, Arsim Bajrami.
Gjatë votimit, në sallë kanë qenë të pranishëm 116 nga 120 deputetë sa ka Kuvendi i Kosovës. Procedura e votimit për Arsim Bajramin ka rezultuar me 44 deputetë, kundër 61 dhe 11 abstenime.
Në bazë të këtij votimi, kandidati i PDK-së nuk mori vota të mjaftueshme për t'u zgjedhur kryetar i Kuvendit
Menjëherë pas dështimit të zgjedhjes së Arsim Bajramit në postin e kryetarit të Kuvendit, kryesuesja Flora Brovina e ka ndërprerë seancën deri në momentin kur ajo do t'i ftojë deputetët të vazhdojnë këtë seancë të filluar që nga 17 korriku.