Rusia dhe rajoni separatist i Gjeorgjisë, Osetia e Jugut, kanë nënshkruar një marrëveshje kufitare, e cila kundërshtohet nga Tbilisi.
Ministri i Jashtëm rus, Sergei Lavrov, dhe minisri de facto i Punëve të Jashtme të Osetisë së Jugut, David Sanakoyev, kanë nënshkruar dokumentin sot në Moskë.
Në nëntor, Moska ka nënshkruar marrëveshjen e “aleancës dhe partneritetit strategjik” me rajonin tjetër separatist të Gjeorgjisë, Abkhazinë.
Gjeorgjia ka kundërshtuar marrëveshjet, duke thënë se ato do të rrisin praninë ruse në Osetinë e Jugut dhe Abkhazi.
Muajin e kaluar, ministrja e Jashtme e Gjeorgjisë, Tamar Beruchashvili, ka thënë se Moska mund të aneksojë Osetinë e Jugut, siç ka aneksuar Krimenë e Ukrainës.
Po ashtu muajin e kaluar, kryeministri i Gjeorgjisë, Irakli Garibashvili, ka kërkuar nga Bashkimi Evropian që të kundërshtojë fuqishëm marrëveshjen kufitare midis Rusisë dhe Osetisë së Jugut.
Rusia ka njohur Osetinë e Jugut dhe Abkhazinë si shtete të pavarura pas një lufte pesëditëshe me Gjeorgjinë në vitin 2008.