Ministri i Punës dhe Mirëqenies Sociale, Arban Abrashi, ka bërë të ditur se në ndërtimin e objektit të Ambasadës Amerikane në Kosovë do të punësohen 600 punëtorë të profileve të ndryshme.
Në një njoftim për media të Ministrisë së Punës thuhet se ministri Abrashi dhe përfaqësuesi i kompanisë B. L Harbert International, Brian J Kelly kanë arritur një marrëveshje që të shfrytëzohen qendrat e aftësimit profesional për testimin paraprak të këtyre punëkërkuesve për profesione të ndryshme.
“Konkurset do të hapen në të gjitha qendrat e punësimit të MPMS dhe me këtë rast ftohen punëkërkuesit që të aplikojnë dhe të shfrytëzojnë këtë mundësi për punësim. Ftohen punëkërkuesit që të shfrytëzojnë këtë mundësi punësimi si dhe mundësinë e ngritjes së tyre profesionale.”, thuhet në njoftim e Ministrisë së Punës dhe Mirëqenies Sociale.
Ambasada Amerikane në Kosovë pritet që këtë vit të nisë punën në objektin e saj në lagjen “Arbëria” në Prishtinë.
