Ndërlidhjet

logo-print

Kushtetuesja pezullon Marrëveshjen për Asociacionin

  • RFE /RL

(©Shutterstock)

(©Shutterstock)

Gjykata Kushtetuese e Republikës së Kosovës ka marrë vendim për pezullim të përkohshëm të Marrëveshjes me Serbinë për krijimin e Asociacionit të komunave me shumicë serbe.

Përmes një njoftimi për media, Gjykata Kushtetuese ka sqaruar se pezullimi vlen deri në vlerësimin e përputhshmërisë së parimeve të Asociacionit të komunave me shumicë serbe me Kushtetutën e Kosovës.

“Ky vendim për masë të përkohshme është pa paragjykim ndaj ndonjë vendimi të mëtejshëm që do të nxirret nga Gjykata për pranueshmërinë apo për meritat e kërkesës”, thuhet në komunikatë.

Kërkesa për interpretim, Gjykatës Kushtetuese i është drejtuar nga presidentja e Kosovës, Atifete Jahjaga, më 30 tetor.

Nisma e presidentes ka pasuar përplasjet dhe tensionet e shtuara politike në raportet pushtet – opozitë në Kosovë.

Partitë opozitare po kundërshtojnë me ngulm marrëveshjen e arritur në dialog me Beogradin për Asociacionin e komunave serbe, duke e konsideruar atë të dëmshme për shtetin e Kosovës dhe hap drejt ndarjes në vija etnike.

Këto përplasje kanë sjellë si pasojë edhe bllokimin e punës së Kuvendit.

Interpretimet e Gjykatës Kushtetuese janë përfundimtare.

Kryeministri Isa Mustafa ka deklaruar se Marrëveshja për Asociacionin nuk do të zbatohet nëse gjykata vlerëson se është në shpërputhje me Kushtetutën. (v.t.)

Trego komentet

XS
SM
MD
LG