Ndërlidhjet

Kremlini mohon akuzat e Partisë Demokrate amerikane


Pamje e përgjithshme e Kremlinit

Pamje e përgjithshme e Kremlinit

Kremlini ka hedhur poshtë akuzat se Rusia qëndron prapa sulmit kibernetik në kompjuterat e Komitetit Kombëtar të Demokratëve duke i quajtur akuzat si absurde.

“Ky lajm absurd është hedhur poshtë menjëherë nga familja e një kandidati të njohur potencial” ka thënë zëdhënësi i Kremlinit, Dmitry Peskov para gazetarëve më 26 korrik, duke iu referuar Donald Trump Jr, djalit të madh të kandidatit republikan për president, Donald Trump.

Peskov gjithashtu është tallur me referimet që i bëhen Rusisë gjatë fushatës zgjedhore presidenciale në SHBA.

“Ne ende po shohim përpjekje për përdorim të tepruar të Rusisë si temë gjatë fushatës zgjedhore amerikane”, ka thënë ai.

Sekretari amerikan i Shtetit, John Kerry ka thënë gjatë ditës se ai e ka ngritur si temë diskutimi akuzën e demokratëve se persona që kanë lidhje me shtetin rus kanë vjedhur komunikimet e brendshme partiake, gjatë takimit me homologun rus, Sergei Lavrov.

Lavrov ka hedhur poshtë akuzat nga ekipi i kandidates së mundshme demokrate, Hillary Clinton që ka thënë se Rusia qëndron prapa rrjedhjes në media të këtyre emailave.

Këshilltarët e Clintonit e kanë akuzuar Rusinë për zbulimin e emailave, përmbajtja e të cilave ka zemëruar përkrahësit e Senatorit Bernie Sanders, duke thënë se kjo është bërë me qëllim që të ndihmohet rivali i Clinton, Donald Trump.

Lavrov ka thënë se përgjigja e drejt ndaj këtyre akuzave do të duhej të përfshinte edhe gjuhë vulgare.

Edhe Trump e ka hedhur poshtë këtë pretendim duke thënë se “është një nga teoritë më të çuditshme të konspiracionit”.

XS
SM
MD
LG