Ndërlidhjet

Blog: Thaçi zgjidhet president i Republikës së Kosovës

Nën tensione politike dhe përplasje të dhunshme në rrugët qendrore të Prishtinës, Kuvendi i Kosovës ka zgjedhur të premten president Hashim Thaçin, në rrethin e tretë të votimit, me 71 vota për.


Pamje nga seanca, 26 shkurt 2016

Pamje nga seanca, 26 shkurt 2016

21:18 26.2.2016

Të nderuar lexues,


Këtu po e përmbyllim këtë mbulim direkt nga seanca e jashtëzakonshme e Kuvendit të Kosovës për të zgjedhur presidentin e ri të vendit, Hashim Thaçin.


Nën tensione politike, me gaz lotsjellës, përplasje të dhunshme në rrugë ndërmjet mbështetësve të opozitës dhe forcave të rendit, e premtja e 26 shkurtit 2016 në Prishtinë përfundoi me festë e fishekzjarre në rrugë, për presidentin e ri.


Zoti Thaçi arriti të sigurojë votat për t'u zgjedhur president në rrethin e tretë të votimeve në Kuvend.


Opozita ndërkaq, është zotuar se do të vazhdojë të protestojë, por nuk ka dhënë ndonjë datë të caktuar.

21:06 26.2.2016

Opozita: Thaçi nuk mund të jetë president

Liderët e opozitës, Lëvizja Vetëvendosje, Aleanca për ardhmërinë e Kosovës dhe Nisma për Kosovën, përmes një konference për medie të mbajtur para pak minutash, kanë theksuar se Hashim Thaçi, i cili në seancën e të premtes të Kuvendit të Kosovës është zgjedhur për president të ri të vendit, “nuk mund të jetë president i Republikës”.

“Në këtë proces të sotëm zgjedhor ka pasur shkelje flagrante të demokracisë”, ka thënë Visar Ymeri, lider i Lëvizjes Vetëvendosje.

20:49 26.2.2016

Gjatë protestës 12 policë kanë marrë lëndime

Drejtori i Klinikës Emergjente në Qendrën Klinike Universitare të Kosovës, Basri Lenjani, ka bërë të ditur për Radion Evropa e Lirë se kërkuar ndihmë emergjente mjekësorë 13 të lënduar prej tyre, 12 pjesëtarë të policisë së Kosovës dhe një gazetarë.

“Gjashtë prej policëve kanë pasur lëndime të ekstremiteteve të poshtme lëndime sipërfaqësore ndrydhje, pas trajtimit janë dërguar për trajtim të mëtutjeshëm. Ndërsa gjashtë pjesëtarë kanë kërkuar ndihmë si pasojë e gazit lotsjellës”, ka treguar Lenjani.

Sa i përket protestuesve, ka shtuar Lenjani nuk ka pasur të lënduar.

20:35 26.2.2016

Festa e PDK-së

Mbështetësit e presidentit të ri të Kosovës, Hashim Thaçi, aktualisht zëvendëskryeministër i Kosovës dhe lider i Partisë Demokratike të Kosovës, kanë festuar në kryeqytet me fishkezjarre për disa minuta.

Trego më shumë

Trego komentet

XS
SM
MD
LG