Ndërlidhjet

Imazh i mirë i Kosovës nëpërmjet kulturës e sportit


Flamuri i Kosovës

Flamuri i Kosovës

Sukseset e shumë individëve nga Kosova shpeshherë kanë bërë që kosovarët të mburren e të ndihen mirë me këto arritje. Për rubrikën e përjavshme ‘’Fokus’’ të Radios Evropa e Lirë, kemi bërë një përmbledhje në lidhje me atë se sa ka ndikuar pozitivisht suksesi i kosovarëve jashtë shtetit në imazhin e Kosovës.

Filmi me titullin “Shok”, i nominuar për çmimin prestigjioz “Oscar”,të cilin e ndan Akademia e Filmit, Pikturës, Arteve dhe Shkencave në Hollywood, pavarësisht se nuk u kurorëzua me këtë çmim, ai përcolli një mesazh mjaft pozitiv nga dhe për Kosovën, vlerësojnë përfaqësuesit e komunitetit të artistëve të filmit në vend.

Filmi “Shok”, me regji dhe skenar të regjisorit britanik Jamie Donoughue, i luajtur nga aktorë kosovarë, i xhiruar në Kosovë, është filmi i parë i cili e përfaqëson kinematografinë e vendit për çmimin “Oscar”.

Regjisorët në vend kanë thënë se prania e filmit “Shok” në një festë të filmit siç është ndarja e çmimit “Oscar”, ka rëndësi të jashtëzakonshme për Kosovën, në shumë aspekte.

Regjisori Isa Qosja, profesor në Fakultetin e Arteve në Universitetin e Prishtinës, duke folur për Radion Evropa e Lirë, konsideron se prezenca e filmit “Shok” në një festë të filmit, siç është ndarja e çmimit Oscar, ka rëndësi të jashtëzakonshme për Kosovën.

“Kosova është ‘klikuar’ me qindra herë, pikërisht për atë që është promovuar ideja që një film nga Kosova flet për Kosovën dhe sjell vlera artistike. Jam i bindur që e kanë shikuar me mjaft xhelozi këtë prani të Kosovës në atë seleksionim të ngushtë”.

“E kjo do të ishte dashur që të çonte një porosi për të gjithë ne dhe të theksonte kërkesën për t’u angazhuar në kulturë, sepse e keni parë që për disa ditë Kosova ka qenë në fokus nëpërmjet kësaj, nëpërmjet kulturës”, thotë ai.

Regjisori Qosja, thekson se, marrë në përgjithësi, nominimi i filmit “Shok” për çmimin Oscar, pavarësisht se filmi nuk e mori këtë çmim, ka krijuar eufori, por edhe energji pozitive në vend.

Aktori Armond Morina, i cili ka luajtur në filmin “Shok”, thotë që edhe pse në Kosovë mungon përkrahja e duhur institucionale, artistët kosovarë janë në nivel të njëjtë me ata ndërkombëtarë, për vetë faktin që edhe u nominuan për çmimin prestigjioz “Oscar’’.

“Në arenën ndërkombëtare, impaktin më të madh për vendin e ka dhënë sporti dhe ngjarjet kulturore. Ndonëse asnjë Qeveri nuk e ka pasur prioritet investimin në kulturë, po e vërejmë dita-ditës se me përkujdesje kaq të vogël institucionale, është kthimi më i madh që po i bëhet vendit”.

“Me vetë faktin që institucionet kanë filluar me e mbështetë Qendrën Kinematografike, ndonëse simbolikisht, impakti po shihet që është i madh. Artistët deri tash kanë punuar me entuziazëm. Ne paguhemi pak, sidomos nëse krahasohemi me artistë në rajon, e të mos flasim për më larg. Por, po shihet që jemi në nivel ndërkombëtar, në nivel paralel me atë çka po ndodh në botë, pasi jemi nominuar për ‘Oscar’. Megjithatë, mbështetja institucionale nuk është e kënaqshme”, vlerëson Morina.

Artistë me prejardhje nga Kosova shpeshherë kanë triumfuar me paraqitjet e tyre në botë.

Këngëtarja me famë botërore, Rita Ora, vazhdimisht e përmend Kosovën nëpër intervistat e saj, dhe rolin e saj si Ambasadore nderi e Kosovës, e përmbushë në maksimum.

Këtë e ka dëshmuar edhe me realizimin e videokilipit të saj “Shine your light” në Prishtinë.

Përveç Rita Orës, një emër tjetër i ri në fushën e muzikës, e që dita-ditës po zë vend më shumë në mediet botërore, është Dua Lipa. Së fundmi ajo ka performuar në “BBC Music Sound of 2016”.

Edhe sportistët kosovarë janë ata që me arritjet e tyre i kanë sjellë medalje të arta Kosovës, duke ndikuar në njohjen e shtetit të ri nëpër botë.

Kampionia e trefishtë e botës në xhudo, Majlinda Kelmendi, duke sjellë medalje të arta, ka bërë që çdo kosovar të ndihet mirë e krenar me të. Gjithashtu, njëri prej yjeve të futbollit evropian me origjinë nga Kosova, por që mbron ngjyrat e shtetit të Zvicrës, Xherdan Shaqiri, vlerësohen si një prej talenteve më të mëdhenj të kësaj fushe.

E të tillë, besohet se ka shumë.

Driton Kuka, selektor i reprezentacionit të Kosovës në xhudo, në prononcimin për Radion Evropa e Lirë thotë se duhet punuar në infrastrukturën ligjore për përkrahje komunale, meqë mungon, derisa shton se përkrahja e nivelit qendror ka qenë deri diku e kënaqshme.

“Imazhi i Kosovës pas shpalljes së pavarësisë është ndërtuar me sukseset që janë arritur në sport. Pra, shteti i Kosovës si një shtet i vogël, ka arritur të ndërtojë sportistë të kalibrit botëror, siç është Majlinda Kelmendi. Pas arritjes së këtyre rezultateve, mbështetja e nivelit qendror ka qenë e kënaqshme. Por, mendoj se duhet të punohet edhe në infrastrukturën ligjore të përkrahjes institucionale në nivel komunal”, thotë Kuka.

E, gjatë vitit 2016, sportistët e Kosovës i presin edheLojërat Olimpike Verore, që nisin në muajin gusht, në Rio de Janeiro, në Brazil.

  • 16x9 Image

    Ariana Kasapolli - Selani

    Ariana Kasapolli - Selani ka lindur më 15.04.1980 në Prishtinë. Shkollimin fillor, të mesëm dhe universitar e ka ndjekur në Prishtinë, ku edhe ka diplomuar në Fakultetin e Gazetarisë. Si korrespondente e Radios Evropa e Lirë punon që nga viti 2009. Është e martuar dhe ka tre fëmijë.

XS
SM
MD
LG