E premte, nëntor 28, 2014 Kosova 15:32

Bota

Kajro: Protestuesit thyejnë barrikadën rreth pallatit

Kajro
Kajro
RFE /RL
Protestuesit në Egjipt kanë thyer barrikadën me tela gjemborë rreth pallatit presidencial në Kajro.

Rreth 10,000 protestues janë tubuar të premten prapa barrikadës së rrethuar edhe me tanke.

Protestat e reja vijnë në përgjigje të vendimit të presidentit Muhammad Morsi, për të mbajtur referendumin e planifikuar më 15 dhjetor për kushtetutën e re.

Disa protestues janë ngjitur mbi tanket e ushtrisë, duke valëvitur flamujt, ndërsa të tjerë kanë kaluar telat gjemborë deri te muret e pallatit, duke brohoritur “Paqe, paqe”.

Trupat e Gardës Republikane kanë siguruar hyrjen kryesore në pallat.


Morsi ofron dialog për kundërshtarët politikë

Gjatë ditës, presidenti i Egjiptit, Muhammad Morsi, propozoi  “dialog kombëtar” me kundërshtarët e tij politikë për ta kapërcyer krizën në këtë vend.

Morsi tha se referendumi për Kushtetutën e re do të mbahet ashtu siç është planifikuar, më 15 të këtij muaji.

Këto komente të Morsit u bënë pasi tanket ishin vendosur para Pallatit Presidencial në Kajro, ku gjatë përleshjeve ndërmjet mbështetëve të tij dhe kundërshtarëve u vranë shtatë vetë dhe u plagosën shumë të tjerë.

Në Egjipt, ka pasur protesta të përditshme prej 22 nëntorit, kur me një dekret presidencial, Morsi i dha vetvetes autorizime më të gjera.

Kajro, 6 dhjetor 2012Kajro, 6 dhjetor 2012
x
Kajro, 6 dhjetor 2012
Kajro, 6 dhjetor 2012
Dekreti i Morsit, sipas të cilit “vendimet dhe ligjet e nxjerra nga presidenti, janë përfundimtare dhe nuk mund t’iu nënshtrohen ankesave”, është cilësuar si autokratik.

Aktivistët pro-reformave e kanë akuzuar presidentin se ka sulmuar idealet e revoltës së vitit të kaluar, e cila rrëzoi regjimin shumëvjeçar të Hosni Mubarakut.

Ata po ashtu janë të pakënaqur me draftin e ri të Kushtetutës,që është hartuar Asambleja e dominuar nga islamistët, për të cilin thonë se minon disa të drejta themelore.

Komisionarja për të Drejta të Njeriut e Kombeve të Bashkuara, Navi Pillay, ka thënë se ka disa elemente “shumë shqetësuese” në draftin e ri të Kushtetutës.

Ndërkohë, raporte për përleshje të dhunshme ka pasur edhe në qytete të tjera të Egjiptit.

Njëherësh, selia e partisë së Morsit, Vëllazëria Myslimane, mbrëmë ishte përfshirë nga zjarri.

Me gjithë trazirat, nënpresidenti i Egjiptit, Mahmud Mekky, ka thënë se referendumi për kushtetutën do të mbahet më 15 dhjetor, ashtu siç është planifikuar.

Shtetet e Bashkuara, të cilat ndihmojnë ushtrinë e Egjiptit me 1.3 miliard dollarë çdo vit, kanë bërë thirrje për dialog.(f.b. & v.t.)
Ky forum është mbyllur
Komentet
     
Nuk ka komente në këtë forum