E shtunë, maj 23, 2015 Kosova 16:54

Kosova shënon 5-vjetorin, synon BE-në dhe NATO-n

Kuvendi i Kosovës
Kuvendi i Kosovës
Me një seancë solemne, Kuvendi i Kosovës shënoi 5-vjetorin e pavarësisë.

Përveç ligjvënësve dhe kabinetit qeveritar, aty morën pjesë edhe presidentja, Atifete Jahjaga, presidenti i Shqipërisë, Bujar Nishani, kryetarja e Parlamentit të Shqipërisë, Jozefina Topalli, përfaqësues të opozitës nga Shqipëria, si dhe përfaqësues nga Maqedonia, Lugina e Preshevës dhe personalitete të njohura vendase dhe ata të korit diplomatik në Prishtinë.

Presidentja Atifete Jahjaga tha se Kosova shpalli pavarësinë e saj në koordinim me vendet mike. Kurse, synim i saj i kamotshëm është që të integrohet në Bashkimin Evropian dhe në NATO.

Tani, Kosova duhet të konsolidojë shtetësinë e saj, vijoi presidentja Jahjaga, duke përsëritur se pavarësia është akt i pakthyeshëm. Ajo tha se dialogu që po zhvillohet me Serbinë, nuk ka për qëllim ndarjen e Kosovës dhe as autonominë territoriale për veriun. 

“Dialogu nuk po zhvillohet për ta ndarë Kosovën, e as për të krijuar enklava të veçanta të askujt, as autonomi e statuse të posaçme. Të gjitha zgjidhjet janë brenda Kushtetutës dhe ligjeve të Kosovës dhe në bazë të standardeve evropiane”, tha në fjalimin e saj Jahjaga.

Ndërkohë, kryeministri Hashim Thaçi tha se pavarësia e Kosovës paraqet sublimim të sakrificave dhe përpjekjeve të vazhdueshme të gjeneratave të tëra.

Kurse, njohja e Kosovës nga vendet më të fuqishme dhe demokracitë më të zhvilluara, paraqet suksesin më të madh, theksoi kryeministri Thaçi.

Hashim ThaçiHashim Thaçi
x
Hashim Thaçi
Hashim Thaçi
“Brenda një periudhe 14-vjeçare, Kosova realizoi dy objektiva të mëdha historike - çlirimin, pra lirinë e saj dhe pavarësinë e saj. Që nga shtatori i vitit që shkoi, Kosova hoqi mbikëqyrjen ndërkombëtare të pavarësisë suksesshëm, duke u bërë shtet me përgjegjësi të plotë për veten dhe ardhmërinë e saj. Kjo është meritë e të gjithëve. Kjo dëshmon se storia e Kosovës është një storie e suksesshme kosovare dhe gjithë-ndërkombëtare”, u shpreh Thaçi.

Një fjalë rasti, para ligjvënësve të Kosovës mori edhe kryetarja e Parlamentit të Shqipërisë, Jozefina Topalli. Ajo tha se kishte nderin që po festonte në Prishtinë ditëlindjen e shtetit të pavarur të Kosovës.

Duke e konsideruar Kosovën si djep të shqiptarizmit, Topalli tha se në këtë ditë duhet rikujtuar të gjithë ata që sakrifikuan për shtetin e Kosovës, duke veçuar dy figura kryesore, presidentin e ndjerë Ibrahim Rugova dhe komandantin e UÇK-së, Adem Jashari.

Topalli tha, po ashtu, se synimi i të gjithë shqiptarëve në rajon është integrimi në strukturat e Bashkimit Evropian.

“Ne duam të bashkohemi me njëri-tjetrin dhe ne duam të bashkohemi me familjen evropiane. Ne në Shqipëri, ju në Kosovë, shqiptarët në Maqedoni, shqiptarët në Mal të Zi. Ne shqiptarët jemi faktor konstruktiv, model i paqes, i lirisë, model për fqinjësinë e mirë”, theksoi Topalli. 

Kurse, kryetari i Kuvendit, Jakup Krasniqi, tha se pavarësia e Kosovës përbën një fakt të pamohueshëm historik. Pesë vjet nuk janë shumë, por ndryshimet që ka bërë Kosova gjatë kësaj periudhe, janë të mëdha, tha Krasniqi.

Në fjalimet e tyre, liderët kosovarë thanë se Kosova ka shënuar shumë përparime, por njëherësh rikujtuan sfidat, sidomos në zhvillimin ekonomik dhe forcimin e shtetit ligjor.

Ata u zotuan se Kosova, si shteti më i ri i evropian, do të shikojë kah e ardhmja përmes integrimit të saj në Bashkimin Evropian dhe në NATO.

Zijadin Gashi

zijadin.gashi+gmail.com

Zijadin Gashi, i lindur më 01 janar 1973 në Prishtinë. Me gazetari ka filluar të merret që nga viti 1997. Si korrespondent i Radios Evropa e Lirë punon që nga maji i vitit 2001.

Twitter
Ky forum është mbyllur
Komentet
     
Nuk ka komente në këtë forum

Përzgjedhja Jonë

Priten një milion metra kub pyje

Kosova ka 460 mijë hektarë pyje. Rreth 80 për qind e lëndëve djegëse në vend kanë burim pyjet. Andaj, ekspertët thonë se pyjet në Kosovë nuk janë në nivel të kënaqshëm, derisa shtojnë se gjatë një viti priten rreth një million metra kub pyje.

Një milion euro për shëndetësi në veri

Qeveria e Kosovës ka ndarë 15 milionë euro për katër komunat në veri të Kosovës, Mitrovicën e Veriut, Leposaviqin, Zubin Potokun dhe Zveçanin. Për sektorin e shëndetësisë janë ndarë 1 milion euro.

Si të vazhdosh jetën kur miqtë të martirizohen?

“Një nga gjërat më të vështira të xhihadit është kur e humbet një mik”, e pranon militanti çeçen i Shtetit Islamik, Musa Abu Yusuf Shishani, në një postim në rrjete sociale të publikuar së fundi.