Këngëtarja e njohur britanike me origjinë nga Kosova, Dua Lipa, shkaktoi një furi komentesh në rrjetet sociale, fundjavën e kaluar, pasi, fillimisht, e ftoi kompaninë amerikane Apple nga profili i saj në Instagram që ta vendosë Kosovën në hartë, ndërsa më pas postoi në Instagram dhe Twitter një fotografi të hartës së "Shqipërisë së Madhe" me mbishkrimin “autochthonous“ (autokton).
Në këtë hartë, përveç Kosovës dhe Shqipërisë, përfshihen pjesë të Malit të Zi, Serbisë, Maqedonisë së Veriut dhe Greqisë.
Poshtë fotografisë, Dua Lipa ka shkruar: “Autokton – mbiemër (banor i një vendi), vendas, jo pasardhës të migrantëve ose kolonistëve".
Përdoruesit e rrjeteve sociale në Serbi kanë shprehur masovikisht pakënaqësinë e tyre.
"Kosova është Serbi", "Nuk ka dorëzim", "Edukohu, historia është e rëndësishme që të mos thuash diçka, sepse ndoshta e ke keqkuptuar dhe ke dashur ta ndash me të gjithë, duke mos e kuptuar se sa e keqe ka qenë ajo histori" - këto janë vetëm disa nga komentet që janë lënë poshtë postimit të Dua Lipës. Komentet janë shoqëruar edhe me simbole serbe.
Në postimin në Twitter ka reaguar edhe Florian Bieber, ekspert për Ballkanin në Universitetin e Gracit, duke shkruar:
“Nacionalizëm i budallait - kur ti beson se kombi yt ka më shumë të drejta sepse është në një vend më gjatë se të tjerët (dhe shpërndan harta të tilla)”.
stu·pid nat·ion·alism, when you believe that your nation has more rights for being in a place longer than others (and share such maps). https://t.co/hxOFfSb3bv
— Florian Bieber (@fbieber) July 19, 2020
Përdoruesit e Twitterit në Serbi, të orientuar nga krahu i djathtë, gjithashtu kanë bërë komente fyese.
Shumë e kanë kujtuar hedhjen e një droni me flamurin e "Shqipërisë së Madhe" në ndeshjen e futbollit midis Serbisë dhe Shqipërisë, në Beograd, në vitin 2014.
Disa përdorues janë ankuar edhe për faktin se Dua Lipës i ka shprehur mbështetje Ivana Cvetkoviq Bajroviq, ndihmëse e drejtorit për Evropën në Fondacionin Kombëtar për Demokraci (NED) në Beograd.
"Zgjuarsia e postimit të Dua Lipës qëndron në përdorimin e një fjale: autokton, që përshkruan me saktësi origjinën e shqiptarëve në territorin e shënuar në foto. "Çfarëdo që lexon dikush në të flet më shumë rreth tyre, sesa për fotografinë që ajo postoi", ka shkruar Cvetkoviq Bajroviq në përgjigjen e saj në Twitter, pas kritikave.
straw man, when you create an illusion of having refuted a proposition by replacing it with a entirely different proposition and then refuting that false argument instead of the opponent%27s original proposition. https://t.co/oFNg3Ks37Y
— Ivana Cvetkovic Bajrovic (@ivanavicvic) July 20, 2020
Postimi, përveç pakënaqësisë, ka nxitur edhe mbështetje për këngëtaren, në mesin e përdoruesve shqiptarë të Twitterit.
“Dua për presidente” është njëri nga komentet e tyre.
“O Tokë Tonë”, ka shkruar futbollisti shqiptar, Lorik Cana.
“Rënie e internetit - mbiemër (Dua Lipa - këngëtarja shqiptare që solli rregulla të reja në popin modern)” – është një koment tjetër.
Breaking•the•internet - adjective(Dua Lipa - Albanian singer who brought new rules to modern pop) https://t.co/L6ROaEHhRU
— Arbër Selmani (@arberiani) July 19, 2020
Fotografinë e Duas e ka shpërndarë në Twitter edhe babai i saj, muzikanti kosovar Dukagjin Lipa.
AUTOCHTHONOUS ❤️ https://t.co/lKr2UEPYyd
— Dukagjin Lipa (@dukagjinlipa) July 19, 2020
Të gjithë kësaj i ka paraprirë reagimi i këngëtares së njohur ndaj një peticioni që kërkon që Kosova të mbahet në hartat e Apple me një yll, apo fusnotë, si pjesë e Serbisë.
Ky peticion aktualisht ka rreth 13,000 nënshkrues.
Peticioni i dytë, i cili ka rreth 93,000 nënshkrime, thotë se është shqetësuese që Kosova nuk tregohet në hartat e Apple.
“Kufijtë e saj mezi shihen dhe më e keqja është se tregohet si pjesë e Serbisë. Kjo duhet ndryshuar sa më shpejt që të jetë e mundur, sepse Kosova është një vend i pavarur që nga viti 2008 ", thuhet në peticion.
Në llogarinë e saj në Instagram, Dua Lipa i ka bërë thirrje kompanisë Apple që ta vendosë Kosovën në hartë.
“Kemi nevojë për disa përgjigje”, i ka shkruar Lipa kompanisë, duke i bërë thirrje që edhe Palestinën ta vendosë në hartë.
Një ditë më vonë, edhe këngëtarja tjetër britanike me prejardhje nga Kosova, Rita Ora, ka kërkuar nga Apple që ta përfshijë Kosovën në hartat e saj.
Would love to see @Apple spreading awareness by putting Kosovo on the map! Albania and Kosovo are full of so much beautiful and great talent. Spreading Love, Peace and Unity today with @BebeRexha @DUALIPA @strefie @Dafina_Zeqiri @AvaMax and soooo many others 🕊🕊🕊🕊 pic.twitter.com/7FP7pkst8I
— Rita Ora ⚡️ (@RitaOra) July 20, 2020
Aktualisht, kufijtë e Kosovës në hartën e kësaj kompanie janë vizatuar me ngjyrë të kuqe të zbehtë, ndryshe nga vendet e tjera që ndahen me një ngjyrë të ndritshme dhe një linjë e trashë.