Asociacioni i Gazetarëve të Kosovës (AGK) i ka shpërblyer me çmim gazetaren Sandra Cvetkoviq dhe kameramanin Arben Hoti të Shërbimit të Kosovës të Radios Evropa e Lirë (REL), gjatë ndarjes së Çmimeve Vjetore të Gazetarisë 2025, në Prishtinë, në mbrëmjen e 10 dhjetorit.
Cvetkoviq dhe Hoti e kanë fituar Çmimin për Raportimin e Ndjeshëm ndaj Konfliktit dhe Ballafaqimin me të Kaluarën.
Ata e ndanë këtë çmim me kolegen e tyre nga mediumi Betimi për Drejtësi, Blendina Veliqi.
Cvetkoviq dhe Hoti u shpërblyen për videon e tyre, "Shtrirja e autoritetit në veri: Për dikë gëzim, për të tjerë sfidë dhe vështirësi" – e publikuar më 23 dhjetor 2024.
Your browser doesn’t support HTML5
Shtrirja e autoritetit në veri: Për dikë gëzim, për të tjerë sfidë dhe vështirësi
Videoja flet për hapat e vazhdueshëm të Kosovës për të shtrirë autoritetin e institucioneve të saj në pjesën veriore, përfshirë heqjen nga qarkullimi të targave serbe, ndalimin e dinarit e deri te shtimi i pranisë së policisë dhe ndikimin e tyre tek serbët lokalë dhe shqiptarët e kthyer në shtëpitë e tyre në veri 25 vjet pas luftës.
Çmimet e tjera
Gazetari i Vitit 2025 u zgjodh Agon Sinanaj nga Buletini Ekonomik.
TV Storja më e mirë: Vlerë Mehmeti nga KTV-ja.
Ueb Storja më e mirë: Besarta Hoti nga portali Nacionale.
Kameramani i Vitit u nda mes Dituron Aliut dhe Altin Zejnaj nga Betimi për Drejtësi, si dhe Korab Bashës nga portali Telegrafi.
Raportimi për Fuqizimin e Grave: Adelina Ahmeti nga Kallxo.com.
Raportimi më i mirë rreth Antigjipsizmit: Besian Beha nga Nacionale.
Raportimi mbi Punëtorët Migrantë: Afërdita Lukaj nga Kanal 10.
Raportimi mbi të Drejtat e Punëtorëve: Egzon Dahsyla nga Kallxo.com.
Raportimi mbi Shëndetin Mendor: Dafina Halili nga Kosovo 2.0.
Raportimi për Ndërtimin e Paqes dhe Besimit: Doruntina Bylykbashi nga TV Dukagjini.
Raportimi mbi Ndryshimet Klimatike dhe Zhvillimin e Qëndrueshëm: Uran Haxha nga Kosovo 2.0.