Raketat e Koresë së Veriut që Rusia po i përdor kundër Ukrainës

Një zjarrfikës (majtas në qendër të fotografisë) punon nën flakët e një ndërtese që po digjet pas sulmeve në Zaporizhja më 11 gusht.

Sulmi me raketa dhe dronë ndaj qytetit përfshiu edhe goditjen e një uzine të përpunimit të metaleve, ku u vranë shtatë persona. Presidenti ukrainas, Volodymyr Zelensky, pretendoi se Rusia përdori raketa balistike të Koresë së Veriut në sulmet ndaj Zaporizhjës.

Nëse konfirmohet se në sulmin ndaj Zaporizhjës u përdorën raketa të Koresë së Veriut, kjo do të shënonte rifillimin e përdorimit të armatimit të Phenianit për sulme ndaj Ukrainës nga territori i Rusisë. Kjo fotografi e janarit të vitit 2024 tregon copëzat e asaj që Ukraina më vonë e identifikoi si një raketë e Koresë së Veriut, pasi ajo goditi një objekt në qytetin lindor të Harkivit.

Në një raport të prillit të vitit 2026, Ministria e Mbrojtjes e Ukrainës identifikoi dy modele të raketave balistike të Koresë së Veriut, për të cilat thotë se janë përdorur kundër Ukrainës. Sipas raportit, bëhet fjalë për raketat Hwasong-11A dhe Hwasong-11B, të njohura sipas emërtimeve amerikane si raketat KN-23, përkatësisht KN-24.

Një fotografi e korrikut 2019 e një rakete balistike KN-23 gjatë testimit në Korenë e Veriut.

KN-23 është një raketë që lëshohet nga një mjet transportues, dhe pamja e saj është e ngjashme me raketën Iskander të Rusisë, por analiza forenzike ushtarake e Ukrainës arriti në përfundimin se këto armë “nuk janë kopje të drejtpërdrejta të modeleve sovjetike/ruse”. Raporti ukrainas tha se ato janë rreth 50 për qind më të gjata se raketat Iskander, çka u mundëson të arrijnë një rreze të ngjashme veprimi, pavarësisht përdorimit të karburantit që është më pak efikas.

Raketat KN-23 të ekspozuara në mjetet e tyre lëshuese gjatë një parade në Phenian, në korrik të vitit 2023.

Besohet se raketa KN-23 mbart një ngarkesë prej rreth 500 kilogramësh dhe ka një rreze veprimi deri në 600 kilometra. Arma është e pajisur me fletëza që i mundësojnë të ndryshojë trajektoren gjatë fluturimit, duke e vështirësuar punën e raketave penguese. Analiza forenzike e kryer nga Ukraina për këtë armë zbuloi se raketa ishte prodhuar duke përdorur teknika të vjetruara prodhimi, të ngjashme me ato që përdoreshin rreth 50 vjet më parë.

Modeli i dytë i raketës që, sipas raportimeve, Rusia e ka përdorur kundër Ukrainës është KN-24, e paraqitur në këtë fotografi të shkrepur gjatë testimeve, që nuk dihet saktë se kur janë zhvilluar.

KN-24 i ngjan sistemit amerikan ATACMS për nga forma dhe funksioni. Ajo u testua për herë të parë në vitin 2019 dhe besohet se ka një rreze veprimi prej rreth 400 kilometrash. Pheniani e përshkruan raketën si një “armë taktike që mund të komandohet” nga distanca.

Sistemet KN-24 të fotografuara gjatë një parade në Kore të Veriut, në janar të vitit 2021.

Sipas raportimeve, raketat KN-24 janë në gjendje të “ngrihen lart” gjatë fazës së fundit të fluturimit për t’u orientuar dhe për të shmangur sistemet e mbrojtjes ajrore. Besohet se raketat mund të mbajnë ngarkesë me peshë 400-500 kilogramë.

Ukrainasit vendosin lule në vendin ku, sipas Ukrainës, një raketë e lëshuar nga Rusia, e prodhuar në Korenë e Veriut, goditi një zonë banimi në Kiev në prill të vitit 2025, duke vrarë disa persona.

Sipas Institutit për Studimin e Luftës (ISW), Rusia e ndërpreu përkohësisht përdorimin e raketave të Koresë së Veriut kundër Ukrainës vitin e kaluar për shkak të problemeve të tyre sa i përket saktësisë.

Një fotografi e publikuar në dhjetor të vitit 2025, që tregon një fabrikë të prodhimit të raketave në Korenë e Veriut, ku duket se ka edhe raketa KN-23.

Sipas ISW-së, raportimet e fundit se Rusia ka rinisur të përdorë predha të Koresë së Veriut mund të tregojnë se ajo po i “teston raketat”, pasi gjatë vitit të kaluar ka bashkëpunuar me Phenianin për përmirësimin e tyre.

Teksa Kievi po has në vështirësi që t’iu kundërvihet sulmeve vdekjeprurëse raketore të Rusisë, zyrtarët ukrainas thonë se Moska edhe një herë po përdorë armë të Koresë së Veriut për të sulmuar qytetet në Ukrainë. Në këtë fotogaleri janë disa raketa që Pheniani raportohet ta ketë furnizuar Rusinë.