Lajme

IS merr përgjegjësinë për sulmin me bombë në Afganistan

Luftëtarët talibanë gjatë patrullimeve në Kabul. Fotografi ilustruese.

Grupi militant Shteti Islamik mori përgjegjësinë për një sulm me bombë ndaj një autobusi pasagjerësh në Kabul të Afganistanit, që ndodhi më 30 prill.

Një grua u vra dhe tre persona u plagosën në sulmin me bombë, tha policia në Kabul.

Megjithatë, deri më tani asnjë grup nuk e ka marrë përgjegjësinë për sulmin me bombë në xhaminë Khalifa Sahib të Kabulit, që la të vrarë të paktën dhjetë persona dhe 30 të plagosur. Kreu i kësaj xhamie ka pretenduar se mbi 50 persona janë vrarë gjatë sulmit.

SHIKONI EDHE:

Rritet numri i viktimave nga shpërthimi në xhaminë në Kabul

Dhjetëra persona janë vrarë në sulmet në Afganistan gjatë dy javëve të fundit të Muajit të shenjtë të Ramazanit, që përfundon më 1 maj.

IS-i ka marrë përgjegjësinë për disa bombardime që kanë pasur për cak kryesisht komunitetet sufiste dhe shiite. Më 22 prill, të paktën 30 persona u vranë në një shpërthim në një manastir sufist në Kunduz.