Personat e prekur me sindromën Down, në Kosovë, kanë arritur që sado pak të inkuadrohen në shoqëri, thonë përfaqësueses të organizatës “Down Sindrom Kosova”.
Me shumë vështirësi dhe sfida, tashmë shumica e fëmijëve me sindromën Down, vijojnë mësimet e rregullta.
Arbëresha Berisha, është nënë e fëmijës me sindromën Down. Djali i saj, Doniku, vijon klasën e dytë në shkollën fillore “Ismail Qemajli”, në Prishtinë. Por, zonja Berisha thotë se mungon stafi i trajnuar për këta fëmijë dhe integrimi i fëmijës së saj në shkollë ka qenë shumë i vështirë.
”Doniku është në klasën e dytë fillore dhe unë jam e obliguar që ta paguaj një asistente speciale që i ndihmon mësueses, për shkak se nuk ka kapacitet një asistente e shkollës të punojë me 15 - 20 nxënës me nevoja të veçanta.”, thotë Berisha.
Ministri i Arsimit, Enver Hoxhaj, thotë për Radion Evropa e Lirë se qëllimi i kësaj ministrie është që të rritet numri i nxënësve, duke përfshirë edhe ata me nevoja të veçanta.
”Tani janë rreth 2000 nxënës që vijojnë mësimet në shkollat fillore dhe të mesme, një pjesë e madhe e tyre janë në shkolla speciale dhe në të njëjtën kohë ka shumë klasë të bashkangjitura brenda shkollave. Qëllimi ka qenë që fëmijët me nevoja të veçanta të mos izolohen dhe të marrin një arsimim cilësor”, shpjegon Hoxhaj.
Sipas ministrit Hoxhaj, rreth 30 për qind të të gjithë mësuesve kanë trajnime për fushën e arsimit special.
Por, Leonora Shabani, udhëheqëse e organizatës “Down Sindrom Kosova”, njëherësh edhe nënë e fëmijës me këtë sindromë, nuk mendon se ka staf të kualifikuar për fëmijët me nevoja të veçanta. Ajo shton se sfidat, me të cilat prindërit e fëmijëve me këtë sindromë janë ballafaquar, nuk kanë qenë të lehta.
”Ne gjithmonë kemi pasur probleme t’i regjistrojmë në shkollë fëmijët me sindromën Down. Tash është pak më lehtë, por prindërit duhet patjetër të jenë këmbëngulës”, tregon Leonora Shabani.
Mirëpo, ministri Hoxhaj thotë se institucioni që ai drejton, tashmë ka hartuar ligjin e ri që adreson në mënyrë afatgjatë arsimin për fëmijët me nevoja të veçanta.
”Kemi një plan individual se si të punohet me fëmijët me nevoja të veçanta. Kemi një plan strategjik 2010 - 2015 se si të trajtohet kjo kategori dhe mendoj se mbështetja ka qenë masive këto tre vjetët e fundit”, thekson Hoxhaj.
Por, zonja Shabani thotë se në letër është specifikuar shumë qartë dhe në mënyrë të përkryer përfshirja e këtyre fëmijëve, por në praktikë është diçka krejt tjetër.
”Edhe prindi duhet ta ngre zërin në mënyrë që institucionet të ndihmojnë pak. Edhe në Ministri të Arsimit flitet për gjithëpërfshirjen e fëmijëve në shkolla të rregullta, por nuk ka mësues adekuatë për të punuar me këta fëmijë”, shprehet Shabani.
Sindroma Down është një nga çrregullimet më të zakonshme që vepron një në 750 lindje dhe predispozitat më të mëdha i kanë nënat mbi 35 vjeçe.
