Rogozin: Amerika armatos ish-terroristët në Kosovë

Rusia ka kërkuar takim urgjent të Këshillit NATO-Rusi për të diskutuar autorizimin e Shteteve të Bashkuara që të furnizojë me armë Kosovën.

"I jam drejtuar sekretarit të përgjithshëm të NATO-s me propozim për një takim joformal të Këshillit NATO-Rusi, për t'i diskutuar planet amerikane për furnizimin me armatim të Kosovës", tha i dërguari i i Rusisë në NATO, Dmitry Rogozin.

Ai tha se ndihma ushtarake amerikane për Kosovën synon të armatosë "ish-terroristët" dhe se ky hap mund të shpijë drejt "përplasjeve të reja terroriste në Ballkan".

"T'u japësh armë ish-terroristëve për luftën kundër terrorizmit, të paktën duket zbavitëse, në mos më keq", ka thënë Rogozin.

"Është mirë e njohur se ata që janë në pushtet në Kosovë kanë ardhur si organizatorë dhe liderë të Ushtrisë Çlirimtare të Kosovës, të cilën shumë shtete e njohin si organizatë terroriste", ka thënë ambasadori i Rusisë në NATO.