Zyrtarë të Qeverisë së Kosovës thonë se nuk kanë informacione për propozim-marrëveshjen Serbi-UNMIK, për bashkëqeverisje në Kosovë, e cila i është dorëzuar zëvendës-kryeadministratorit të Kosovës, Larry Rosin, nga ministri i Qeverisë së Serbisë për Kosovën, Sllobodan Samarxhiq.
UNMIK-u ende nuk i ka kthyer përgjigje Qeverisë serbe rreth këtij dokumenti, meqë propozimin në fjalë e ka dërguar për shqyrtim në Zyrën Ligjore të OKB-së në Nju Jork.
Por, qeveritarët e Kosovës hedhin poshtë çdo mundësi të zbatimit të ndonjë marrëveshjeje të tillë. Zëvendëskryeministri i Kosovës, Hajredin Kuçi, thotë se me Kosovën mund të qeverisë vetëm qeveria e saj, si dhe komuniteti ndërkombëtar.
“Ne nuk kemi informacione për një gjë të tillë. Me Kosovën do të qeverisë Qeveria e Kosovës me bashkësinë ndërkombëtare; Serbia asnjëherë", tha zoti Kuçi.
Nga na tjetër, analisti politik, Driton Lajçi, thotë se në Kosovë tashmë ekziston një realitet i ri dhe se marrëveshjet e tilla nuk kanë kurrfarë efekti edhe nëse ato ndodhin. Ai konsideron se propozimet e tilla janë të vonuara dhe, sipas tij, Beogradi me veprime të tilla po synon që mos ta njohë realitetin e ri në Kosovë.
"Kjo bie ndesh me fazën e tranzicionit të kompetencave nga UNMIK-u në institucionet e Kosovës. UNMIK-u nuk ka nevojë të dakordohet ose të mos dakordohet, sepse ata tashmë janë duke hyrë në fazën e transferimit të kompetencave, për t'ua lënë kompetencat Qeverisë së Kosovës dhe EULEX-it", tha Lajçi.
Zoti Lajçi tha se me iniciativat e tilla, por edhe me ato të mëhershmet, të cilat i ka iniciuar Beogradi, është tentuar t'i bëhet dëm Kosovës dhe, sipas tij, ato tashmë nuk kanë kurrfarë rëndësie.
Qeveria e Serbisë, përmes kësaj marrëveshjeje, tenton të intensifikojë bashkëqeverisje me UNMIK-un në shumë fusha, ndër të cilat është ajo e sigurisë, gjyqësisë, si dhe e kontrollimit të kufirit.
Por, analisti Lajçi thotë se pavarësisht se çka përmban propozim-marrëveshja e Beogradit, ajo bie ndesh me pakon e Martti Ahtisaarit.
“Pavarësisht se çka përmban ajo, do të thotë sa i përket veriut të Mitrovicës dhe qytetit të Mitrovicës në tërësi, vlen ajo pika e pakos së Ahtisaarit, ku Mitrovica do të qeveriset prej bordit ku do të përfshihen përfaqësuesit legjitimë të veriut dhe jugut dhe tash për tash ky është propozimi dhe vendimi i fundit. Çdo iniciativë tjetër bie ndesh me këtë, bie ndesh me planin e Ahtisaarit dhe bie ndesh me shtetin e pavarur dhe sovran të Kosovës", tha Lajçi.
Sidoqoftë, zyrtarët e UNMIK-ut thonë se janë duke pritur ende instruksionet nga Zyra Ligjore e Kombeve të Bashkuara në Nju Jork, se si të veprohet pas këtij propozimi të Qeverisë serbe.
