Ndërlidhjet

Kosova s’mund të vendosë vetë për embargo


CEFTA, vendet anëtare

Kosova nuk mund të marrë vendim për bllokimin e mallrave të Serbisë dhe Bosnje e Hercegovinës që hyjnë në Kosovë, pa koordinim me misionet ndërkombëtare të instaluara në Kosovë. Ekspertë të çështjeve ekonomike thonë se edhe kjo çështje ka të bëjë me paqartësitë rreth kompetencave.


Qeveria e Kosovës e cila ka menduar që mund t'i koordinojë veprimet nëpërmjet EULEX-it për bllokimin e produkteve të Serbisë dhe Bosnjë e Hercegovinës, sipas ekspertëve për çështje ekonomike, paraqet vështirësi, pasi që çdo vendim duhet të jetë i koordinuar nga të 27 vendet anëtare të bllokut evropian.

Eksperti për çështje ekonomike, Muhamet Sadiku, thekson se vendimi për bllokimin e mallrave të këtyre dy shteteve, nuk do të mund të merret vetëm nga institucionet e Kosovës.

"Kosova është një projekt ndërkombëtar edhe tani, prandaj të gjitha veprimet e Kosovës duhet të koordinohen me misionet të cilat janë të instaluara në Kosovë, sepse vetëm atëherë do të kemi një analizë më komplete të kost-benefitit lidhur me veprimet eventuale që do t'i ndërmerr Kosova në drejtim të Serbisë dhe Bosnjë e Hercegovinës", thekson zoti Sadiku.

Megjithatë, ai thotë se Kosova në situatën e re të krijuar ka kapacitete institucionale për të ndërmarrë masa kundërvënëse. Por, sipas zotit Sadiku, para marrjes së një vendimit për reciprocitet, duhet pritur shterjen e mundësive për të biseduar...

"Këto veprime të Serbisë dhe Bosnjës e Hercegovinës janë të motivuar politikisht, prandaj mendoj se lëvizjet në këto vendime janë shumë të rëndësishme edhe për rajonin edhe për Serbinë", thotë ai.

Në anën tjetër, drejtuesi i Institutit për Studime të Avancuara GAP, Shpend Ahmeti, thotë se nëse gjykohet në bazë të asaj se si ka vepruar Qeveria e Kosovës gjatë këtyrë nëntë muajve të fundit, atëherë vështirë se mund të merret ky vendim pa koordinim me misionet ndërkombëtare.

Ai thekson se arsyeja kryesore e mos marrjes së vendimit për bllokimin e produkteve të këtyre vendeve është përzierja e kompetencave me UNMIK-un, EULEX-in dhe Zyrën Civile Ndërkombëtare.

Zoti Ahmeti, u rekomandon institucioneve të Kosovës që hapi i radhës të jetë bllokimi i mallrave, pastaj presioni në CEFTA do të vijë vetë nga ana e Begoradit dhe Sarajevës dhe takimi i sekretariatit të CEFTA-s do të do të mbahet shumë më shpejtë se që mendohet tani.

"Ky vendim duhet të merret tani, nuk ka mbetur asnjë zgjidhje tjetër, vetëm bllokimi i mallrave dhe CEFTA do të mbante takim për dy javë. Në këtë rast Kosova ka provuar edhe anën ligjore, ka kërkuar nga Mali i Zi, i cili e ka refuzuar kërkesën. Përfundimisht, duhet të sillemi si shtet, ka kaluar koha e UNMIK-ut, duhet që institucionet e Kosovës të marrin përgjegjësinë", thotë zoti Ahmeti.

Gjithashtu, edhe eksperti për çështje ekonomike, Ibrahim Rexhepi, thotë se institucionet e Kosovës nuk kanë ndonjë hapësirë shumë të madhe të veprimit. Sipas tij, institucionet e Kosovës duhet të fillojnë një procedurë e cila do të ishte dashur të nisë që para një viti.

"Të gjithë anëtarët e CEFTA-s është dashur të lajmërohen që Kosova është shtet dhe përfaqësohet nga institucionet e Kosovës. Të marrin masa më radikale dhe të kenë një qëndrim më të ashpër ndaj tregtisë së lirë, në veçanti ndaj Serbisë dhe Bosnjës e Hercegovinës", thotë zoti Rexhepi.

Megjithatë, zoti Rexhepi konsideron se bllokada e produkteve të Serbisë dhe Bosnjë e Hercegovinës është një masë shumë radikale dhe një masë e cila është vështirë të kontrollohet dhe të implementohet qind për qind, duke marrë parasysh strukturën e popullatës që banon në zonat kufitare me Serbinë.

Ndryshe, që nga 3 dhjetori i vitit të kaluar, Serbia dhe Bosnja e Hercegovina i kanë vënë embargo produkteve të Kosovës. Arsye për këtë është vula doganore e Kosovës që figuron në prodhimet vendore, gjë e cila ka nxitur reagimin e Serbisë dhe Bosnjës.
  • 16x9 Image

    Luljeta Krasniqi - Veseli

    Luljeta Krasniqi, e lindur më 02.05.1981. Me gazetari ka filluar të merret që nga viti 2005. Për një kohë të gjatë ka punuar si gazetare në Agjencinë e lajmeve Kosovalive. Ekipit të Radios Evropa e Lirë i është bashkuar në vitin 2008.

XS
SM
MD
LG