Sekretarja amerikane e Shtetit, Hillari Klinton, mbërriti në Haiti për të inspektuar dëmet nga tërmeti i së martës.
Pas bisedimeve me presidentin Rene Preval, Klinton u tha haitianëve se Shtetet e Bashkuara do të sigurojnë që vendi i tyre të dalë nga katastrofa “më i fortë dhe më i mirë”.
“Por, unë dua të siguroj popullin e Haitit se Shtetet e Bashkuara të Amerikës janë mik, partner dhe mbështetës, ndaj do të punojmë me qeverinë tuaj nën drejtimin e presidentit Preval, që të ndihmojmë në çdo mënyrë të mundshme”, tha Klinton.
Presidenti Barak Obama i ka zgjedhur ish-presidentët Xhorxh Bush dhe Bill Klinton të drejtojnë grumbullimin e ndihmave humanitare.
Kombet e Bashkuara thanë se katastrofa është më e keqja, me të cilën është përballur ndonjëherë.
Ministri i brendshëm, Paul Antoan Bien-Aime tha se 50 mijë kufoma tashmë janë gjetur dhe bilanci përfundimtar i të vdekurve mund të shkojë prej 100 mijë deri në 200 mijë.
* * * * *
Po sot, Kombet e Bashkuara e kanë konfirmuar vdekjen e kreut të misionit të saj në Haiti.
Organizata tha se trupi i pajetë i Hedi Annabi është gjetur nën rrënojat e selisë së misionit të OKB-së në Port-o-Prins, e cila u shemb nga tërmeti.
Sekretari i përgjithshëm Ban Ki-Mun, tha se janë gjetur edhe kufomat e zëvendësit të Anabit, Luiz Karlos da Kosta, si dhe ushtruesit të detyrës së komisionerit të policisë, Dag Kouts.
(V.P.)
