Përfaqësues të Agjencisë Kosovare Kundër-korrupsion dhe të organizatave të tjera vendore, deklarojnë se niveli më i lartë i korrupsionit në Kosovë është në sistemin e drejtësisë.
Drejtori i Agjencisë Kundër-korrupsionit, Hasan Preteni, thotë se gjatë vitit 2009, numri i informatave që është pranuar në institucionin e tyre, në krahasim me vitet e kaluara, është shumë më i madh.
“Mund të them me përgjegjësi të plotë se numri i informacioneve që është pranuar në agjenci, në vitin 2009, është në përqindje më i madh se ai që është pranuar në vitin e kaluar, por dhe rastet e denoncuara në prokuroritë kompetente janë më të shumta”.
“Ndryshim esencial është që, tani në vitin 2009, nuk i kemi proceduar informacionet vetëm në prokuroritë vendore, por i kemi proceduar disa informacione edhe në prokurorinë e EULEX-it”, thotë Preteni.
Preteni thekson se disa nga informacionet, të cilat janë dorëzuar në organet e drejtësisë, janë refuzuar për faktin se ato kanë qenë pikërisht për korrupsion në vetë ato institucione.
“Prokuroritë na kanë refuzuar, kur rastet i përkisnin mu Gjyqësorit. Ne i kemi trajtuar e ritrajtuar prapë ato informacione dhe kemi vlerësuar që bazat, elementet dhe provat janë të mjaftueshme, i kemi riaktivizuar duke i dërguar te prokuroria e EULEX-it”, deklaron Preteni.
Ndryshe, në një raport vjetor të rasteve më të korruptuara për vitin 2009, i cili është publikuar të mërkurën, nga Qendra për Avokim dhe Këshilla Ligjore, në kuadër të Institutit Demokratik të Kosovës , tregon se në Kosovë sektori me nivelin më të lartë të korrupsionit është Gjyqësori.
Merita Mustafa, menaxhere në programin për transparencë dhe anti-korrupsion shpjegon:
“Gjatë vitit 2009, kemi marrë gjithsej 103 raste, të cilat tregojnë se institucionet më të prekura nga korrupsioni në Kosovë janë: gjyqësia, edukimi, sektori privat, të drejtat pronësore, prokurimi publik dhe fusha e inspeksioneve/licencave”.
Në raport thuhet se pas sektorit të Gjyqësorit, me përqindjen prej 19 për qind të rasteve të raportuara, vjen sistemi i edukimit me 12 për qind, sektori privat me 11 për qind, prokurimi publik me 8 për qind etj.
Mustafa, gjithashtu thekson se raporti tregon edhe mënyrën se si paraqitet korrupsioni në Kosovë
“Sa i përket mekanizmave se si zhvillohet në këto institucione, në përgjithësi, praktikat më të përhapura janë mitoja, sidomos në prokurimin publik, familjarizimi, manipulimi i konkurseve për pranim në punë dhe largimet arbitrare nga puna”.
“Ndërsa, gjyqësia vazhdon të mbetet sektori më i korruptuar dhe ndër praktikat në këtë sektor, janë lidhjet familjare dhe ndikimi nga jashtë”, shprehet Mustafa.
Ndryshe, raporti konstaton gjendje të rëndë të përhapjes së korrupsionit në Kosovë dhe u bën thirrje institucioneve të kosovare për luftimin e kësaj dukurie.