Ndërlidhjet

Gjermania kërkon heqjen e rezolutës


Johanna Deimel nga Asosacioni për Evropën Juglindore.
Johanna Deimel nga Asosacioni për Evropën Juglindore.

Ministri i Jashtëm gjerman do të përpiqet ta bindë Serbinë ta tërheqë rezolutën, ose së paku ta zbusë atë, por në fund kjo mbetet në dorë të Serbisë, thotë Johanna Deimel nga Asosacioni për Evropën Juglindore.



RADIO EVROPA E LIRË
Cilat janë mesazhet që do të sjellë ministri i Jashtëm i Gjermanisë gjatë turneut të tij në Ballkan, që fillon të mërkurën?

JOHANNA DEIMEL

Së pari, është shumë e rëndësishme që ministri gjerman zhvillon turneun e tij në Ballkan me mesazhin se Gjermania mbetet e përkushtuar ndaj Ballkanit në kohën kur kryeqytetet e tjera evropiane nuk janë shumë të interesuara për rajonin.

Ai do të japë disa mesazhe. I pari ka të bëjë me atë se Gjermania vazhdon të jetë e angazhuar që ta sjellë Ballkanin më pranë Bashkimit Evropian dhe anëtarësimit në BE.

Së dyti, çështja e Kosovës është e mbyllur pas vendimit të Gjykatës Ndërkombëtare të Drejtësisë. Ai do të kërkojë që të shikohet drejt së ardhmes dhe kjo është e rëndësishme, si për Kosovën, ashtu edhe për Serbinë, që të mos jenë pengje të së kaluarës.

RADIO EVROPA E LIRË
Sipas jush, a është e saktë të thuhet se ministri i Jashtëm gjerman do të ushtrojë presion ndaj Serbisë që ta tërheqë apo ta ndryshojë propozim rezolutën e paraqitur në Asamblenë e Përgjithshme?

JOHANNA DEIMEL

Siç e thashë dhe më parë, pozicioni i Gjermanisë është i qartë. Pas opinionit të GJND-së, pavarësia e Kosovës është e padiskutueshme dhe nuk është më çështje për diskutim.

Serbia është shtet i pavarur dhe mund të paraqesë propozim rezoluta në Asamblenë e Përgjithshme me përmbajtjen që dëshiron, por kjo do të shkaktojë më shumë ndarje - ndarje të panevojshme.

Kjo do të mund t’i thellojë ndarjet mes Serbisë, Shteteve të Bashkuara dhe me vendet e Bashkimit Evropian. Është rrugë diplomatike e zgjedhur nga Serbia, por nuk është një mënyrë aspak e sofistikuar për t’iu qasur çështjes së Kosovës thjesht duke e sjellë në tryezë.

Ministri i Jashtëm gjerman do të përpiqet ta bindë Serbinë ta tërheqë rezolutën, ose së paku ta zbusë atë, por në fund kjo mbetet në dorë të Serbisë.

RADIO EVROPA E LIRË
Thatë në fillim të kësaj interviste se është e rëndësishme që Gjermania të tregojë përkushtim ndaj Ballkanit derisa nuk ndodh kështu me shumë kryeqytete evropiane. Ekziston bindja se mesazhet e shefit të diplomacisë gjermane gjatë kësaj vizite janë dhe mesazhe të BE-së. A është e saktë një bindje e tillë?

JOHANNA DEIMEL

Padyshim Gjermania është një nga vendet më të rëndësishme të Bashkimit Evropian dhe ajo që ministri i saj thotë, ka peshë. Por, ai nuk mund të flasë në emër të Bashkimit Evropian.

Ai mund të sjellë disa mesazhe që i ndajnë dhe kryeqytete të tjera evropiane, por jo të gjitha. Por, siç e dini vendet anëtare të BE-së nuk kanë një zë të përbashkët rreth Kosovës. Pesë vende nuk ndjekin rrugën dhe qëndrimet e 22 vendeve të tjera.

RADIO EVROPA E LIRË
A mendoni se ministri i Jashtëm gjerman do ta kushtëzojë integrimin evropian të Serbisë me çështjen e Kosovës?

JOHANNA DEIMEL

Para së gjithash më duhet të them se nuk është kusht. Kushtet janë përcaktuar në kriteret e Kopenhagës dhe vendet do të vlerësohen bazuar te meritat dhe përmbushja e reformave.

Duke e thënë këtë, nuk përjashtohet fakti se pas përvojës ku Bashkimi Evropian pranoi Qipron si anëtare të veten, vendet anëtare të BE-së do të hezitojnë, sepse nuk duan një lloj Qiproje të dytë në Union. Në këtë kuptim, Kosova është kusht.

RADIO EVROPA E LIRË
Zëdhënësi i Ministrisë së Jashtme gjermane tha se Berlini do të kërkojë nga Serbia e Kosova normalizimin e raporteve. A është i mundur ky realizim në kushtet kur Beogradi nuk e pranon Kosovën?

JOHANNA DEIMEL

Shoh se ka nevojë dhe ka mundësi për t’u realizuar. Nëse shikoni zhvillimet e fundit në Kosovë, faktin se serbët e Kosovës në pjesën jugore janë gjithnjë e më shumë më të gatshëm e më pragmatikë të integrohen dhe ta pranojnë Kosovën si shtetin e tyre dhe të pranojnë institucionet e Kosovës, atëherë kemi një presion më të madh ndaj Beogradit.

Po shohim se edhe serbët e Kosovës në veri po tregojnë gjithmonë e më shpesh shenja se janë të gatshëm ta pranojnë realitetin në terren dhe të bëhen më pragmatikë. Në këtë kuptim, kemi gjithmonë e më shumë serbë në Kosovë që po përqafojnë një qasje më pragmatike dhe kërkojnë zgjidhjen e problemeve.

Nga ana tjetër, Serbia nuk ka interes që serbët e Kosovës të ikin dhe të vendosen në Serbi. Në këtë kuptim, kemi shumë tregues dhe zhvillime që e bëjnë të nevojshëm dialogun, si brenda Kosovës, mes shqiptarëve dhe serbëve, ashtu edhe mes Prishtinës e Beogradit.

RADIO EVROPA E LIRË
Thatë se serbët në veri të Kosovës po tregojnë më shumë gatishmëri për të bashkëpunuar me institucionet e Kosovës, por, nga ana tjetër, duket se veriu është kyçi i problemit. Serbia duket sikur po e përdorë veriun për të vazhduar betejën për Kosovën. Si e shikoni veriun dhe cili është pozicioni i Berlinit në këtë çështje?

JOHANNA DEIMEL

Pozicioni i Gjermanisë rreth veriut është i qartë: Veriu është pjesë integrale e Kosovës. Kjo nuk është çështje për diskutim. Çdo lloj sugjerimi për ndonjë Republikë Autonome të Veriut të Kosovës, apo për status special të kësaj pjese, nuk është i vlefshëm, pasi gjithçka është në Planin Ahtisari.

Plani parasheh kushte të posaçme për serbët e Kosovës dhe ata kanë shumë përfitime nëse ndjekin Planin Ahtisari. Pozicioni është shumë i qartë: Nuk ka asgjë për të ndryshuar nga Plani Ahtisari.
XS
SM
MD
LG