Serbia nuk guxon të pengojë të tjerët që duan të bashkëpunojnë me Kosovën, ka thënë sot në Prishtinë, ish presidenti kroat, Stjepan Mesiq, pas takimit që zhvilloi me kryeministrin e Kosovës, Hashim Thaçi.
Zoti Mesiq, është takuar edhe me kryetarin e Kuvendit të Kosovës, Jakup Krasniqi dhe zëvendëskryeministrin, Behxhet Pacolli, me ftesën e të cilit edhe është realizuar vizita e zotit Mesiq në Kosovë.
Ish presidenti kroat ka shfrytëzuar takimin e sotëm me zotin Thaçi për të bërë thirrje për bashkëpunim më të thellë rajonal.
Në këtë rajonin tonë, ne mund ta ndhmojmë njëri-tjetrin nëse bashkëpunojmë. Serbia mund të mos e njohë Kosovën, por nuk guxon të pengojë të tjerët që bashkëpunojnë me të
“Për këtë, kemi nevojë për ndihmën e Evropës dhe komunitetit ndërkombëtar, përfshirë këtu edhe Kombet e Bashkuara”, ka thënë Mesiq.
“Nëse një popull dëshiron pavarësinë e vet, shtetin e vet, ai njëkohësisht dëshiron edhe të jetojë më mirë, në mënyrë më të kulturuar dhe më cilësore, por për këtë duhen mjetet. Prandaj, tani është e rëndësishme të zhvillohet ekonomia”, ka thënë ish presidenti kroat, duke bërë thirrje edhe për aktivizimin e resurseve që Kosova ka në këtë rrafsh.
Ai edhe me këtë rast ka rikujtuar se me zhbërjen e Jugosllavisë, elementet konstituive kanë pasur të drejtën për pavarësinë e tyre, përfshirë këtu edhe Kosovën, si një nga element konstituive të ish federatës.
Vizita e ish presidentit kroat për qëllim ka edhe promovimin e librit të tij “Si u shkatërrua Jugosllavia”.
Të mërkurën ndërkaq, ai do të nderohet me titulln “Doctor Honoris Causa” nga universiteti AAB-Riinvest.
Në vizitën e fundit në Kosovë, në janar të 2010-ës, Mesiq ishte dekoruar me “Medaljen e Artë të Pavarësisë” dhe ishte shpallur “Qytetar Nderi i Prishtinës”. (a.v.)
