Kabul, sulmet në Këshillin Britanik
Kamikazët kanë sulmuar kompleksin britanik në Kabul, duke vrarë të paktën nëntë njerëz. Talibanët kanë marrë përgjegjësinë për sulmin që ndodhi në përvjetorin e Pavarësisë së Afganistanit nga Britania.
Forca Ndërkombëtare e Sigurisë (ISAF) tha se trupat e huaja ishin në vend të ngjarjes për t'i ofruar ndihmë policisë afgane.
Këshilli Britanik është një agjenci e financuar nga qeveria, e cila drejton programe kryesisht kulturore.
Zëdhënësi i talebanëve, Zabihullah Muxhahid, tha se militantët kanë në shënjestër edhe një kompleks të Kombeve të Bashkuara, jo larg zyrave të Këshillit Britanik.
Por, zëdhënësi i misionit të OKB-së në Afganistan, Den Meknorton, ka mohuar se ndonjë objekt i këtij misioni është vënë në shënjestër. (v.t.)
